(දිලීප් ජයසේකර)
 
සෙල්ලකතරගම ගෝතමීගම ඩෝසර් වැව අසළ සැකකටයුතු ලෙස හැසිරුණු පුද්ගලයන් දෙදෙනෙකු අද (11) අත්අඩංගුවට ගත් බව තංගල්ල කොට්ඨාස සංවිධානාත්මක අපරාධ මැඩලීම් ඒකකය පවසයි.
 
මෙලෙස අත්අඩංගුවට ගෙන ඇත්තේ සෙල්ලකතරගම සහ ගෝතමීගම යන ප්‍රදේශවල පදිංචි 35 හා 38 යන වයස්වල පසුවන සැකකරුවන් දෙදෙනෙකි.
 
සෙල්ලකතරගම ගෝතමීගම ඩෝසර් වැව අසළ සැකකටයුතු ලෙස පුද්ගලයන් දෙදෙනෙකු සිටින බවට ප්‍රදේශවාසීන් තංගල්ල කොට්ඨාසබාර පොලිස් අධිකාරීවරයාට ලබා දුන් තොරතුරක් අනුව මොවුන් අත්අඩංගුවට ගෙන ඇත.
 
සැකකරුවන් දෙදෙනාගෙන් කළ ප්‍රශ්න කිරීමේදී දඩයමේ යාම සඳහා ගිනි අවි රැගෙන ආ බව අනාවරණය වී ඇත. ඩෝසර් වැව අසළ කැළයක සඟවා තිබූ  එම ගිනි අවි පොලිසිය බාරයට ගෙන ඇති බව පොලිසිය කියයි.
 
සැකකරුවන් දෙදෙනා සහ ගිනි අවි වැඩිදුර විමර්ශන කටයුතු සඳහා කතරගම පොලීසියට බාරදී තිබේ.
 
සැකකරුවන් දෙදෙනා තිස්සමහාරාම මහේස්ත්‍රාත් අධිකරණයට ඉදිරිපත් කිරීමට නියමිතය.