(මහේෂ් කිර්තිරත්න)

ඇල්කඩුව වැවිලි සමාගමට අයත් සෙම්බුවත්ත වතු යායේ පිහිටි ස්වභාවික ජල උල්පත් 11කින් සැදුම් ලත් විශාල උල්පතක් භාවිතාකරමින් වතු පාලනාධිකාරිය විසින් පානීය ජල බෝතල් ව්‍යාපෘතියක් ආරම්භ කිරීමට සැලසුම් කරමින් පවතින බව පවසමින් ඊට විරෝධය පළ කිරීමේ උද්ඝෝෂණයක් අද (21) සෙම්බුවත්ත තේ කර්මාන්ත අසළදි පැවැත්විණි.

මේ සදහා වතු කම්කරුවන් විශාල පිරිසක් සහභාගි වී සිටි අතර ඔවුන් පැවසුයේ වතු යායේ ඇති මෙම ඓතිහාසික ජල උල්පත මගින් වත්තේ ඇති දේවස්ථානවල ආගමික වතාවන් සිදු කිරීම සදහා ජලය භාවිතා කරන බවත් පවුල් 200ක ආසන්න පිරිසක් මෙම ජල උල්පතින් ප්‍රයෝජනය ලබන බවය.

මෙම පානීය ජල බෝතල් ව්‍යාපෘතිය ආරම්භ කිරීමට මූලිකත්වය ගෙන කටයුතු කරන සෙම්බුවත්ත වතු අධිකාරිවරයාට උද්ඝෝෂණයෙහි යෙදුනු වතු කම්කරුවෝ දැඩි විරෝධතාවයක් එල්ල කළහ.
 
මෙම ව්‍යාපෘතියට විරෝධතාවය පළ කරමින් දැනට දින තුනක් තිස්සේ වතු කම්කරුවන් වැඩ වර්ජනයක නිරත වී සිටින බවත් ඇල්කඩුව වැවිලි සමාගමේ ඉහළ බලධාරින් මේ සදහා අවධානය යොමු කර කඩිනමින් නිසි පියවරක් ගන්නා ලෙසද උද්ඝෝෂනයෙහි යෙදුනු වතු කම්කරුවෝ පැවසුහ.
 
මේ වන විට දේශීය හා විදේශීය සංචාරකයින් පැමිණෙන සෙම්බුවත්ත වැව නැරඹිම සදහා ප්‍රවේශ පත්‍ර නිකුත් කිරීමේ ස්ථානද වසා දමා ඇති අතර සංචාරකයෝද දැඩි අපහසුතාවයන්ට පත් ව සිටිති.

මේ පිළිබදව විමසීම සදහා වතු අධිකාරි රැඩ්ලි දිසාගේ මහතා සම්බන්ධකරගැනීමට අවස්ථා ගණනාවකදීම උත්සහ දැරුවද එය ව්‍යර්ථ විය.