(කේෂර ගුණතිලක)
 
2018 මහකන්නයේදී මොනරාගල දිස්ත්‍රික්කයේ සේනා දළඹුවාගෙන් හානි සිදුවූ බඩඉරිඟු වගාවන්ට මෙතෙක් වන්දි නොලැබුණු ගොවීහු පිරිසක් අද (29) මොනරාගල දිස්ත්‍රික් ලේකම් කාර්යාලය ඉදිරිපිටදී සාමකාමී විරෝධතාවක නිරත වූහ.

පෙරටුගාමී සමාජවාදී පක්ෂයට අනුබද්ධිත ගොවි ජන අරගල ව්‍යාපාරය සංවිධානය කළ මෙම උද්ඝෝෂණයට සහභාගී වූ ගොවීහු හුළංදාව හන්දියේ සිට පෙළපාලියකින් මොනරාගල දිස්ත්‍රික් ලේකම් කාර්යාලය ඉදිරිපිටට පැමිණ උද්ඝෝෂණයක නිරත වූහ. 

ගොවි ජන අරගල ව්‍යාපාරයේ ජාතික සංවිධායක විමල් වත්තුහේවා මහතා ඇතුළු ගොවීහු 200කට ආසන්න පිරිසක් මෙම උද්ඝෝෂණයට එක්ව සිටියහ.

විරෝධතාකරුවන්ගෙන් කිහිපදෙනෙක් මොනරාගල දිස්ත්‍රික් ලේකම් කාර්යාලයේ පැවති දිස්ත්‍රික් සම්බන්ධීකරණ කමිටුවට සහභාගිවී සිටි රාජ්‍ය පරිපාලන ආපදා කළමනාකරණ හා පශු සම්පත් සංවර්ධන ඇමති රංජිත් මද්දුම බණ්ඩාර මහතා සමඟ සාකච්ඡා කළහ. 

ඇමතිවරයා එම වගාවන්ට වන්දි ලබාදෙන බවට පොරොන්දුවීමෙන් පසු විරෝධතාකරුවෝ විසිර ගියහ.