(නිමල කොඩිතුවක්කු)
 
ත‍්‍රස්තවාදය මැඩලීම සඳහා ආරක්ෂක අංශ සිදුකරන විමර්ශනවලට බාධා කරමින් සිටින බැවින් කර්මාන්ත හා වාණිජ කටයුතු අමාත්‍ය රිෂාද් බදියුදීන් මහතාට එරෙහිව වහාම නීතිය ක‍්‍රියාත්මක කරන ලෙස ඉල්ලමින්  සත්‍ය ගවේෂකයෝ සංවිධානය පොලිස් මූලස්ථානය වෙත අද(17)  පැමිණිල්ලක් ඉදිරිපත් කරනු ලැබීය.
 
රිෂාද් බදියුදීන් මහතා අමාත්‍යධුරයක් දරමින් ත‍්‍රස්තවාදී සැකකරුවන් මුදා හැරීමට බලපෑම් කර ඇති බවත් එය මෙරට නීතියේ ආධිපත්‍යයට එල්ල වූ බලවත් තර්ජනයක් බවත් සත්‍ය ගවේෂකයේ සංවිධානයේ කැඳවුම්කරු නීතීඥ පේ‍්‍රමනාත් දොළවත්ත මහතා පැවැසීය.
 
මෙම ක‍්‍රියාව මගින් ත‍්‍රස්තවාදයට ආධාර අනුබලදීමක් සිදුව ඇති බවත් මේ සම්බන්ධයෙන් සහ ඔහුගේ වෙනත් ක‍්‍රියාවන් සම්බන්ධයෙන් පුළුල් විමර්ශනයක් කර වහාම නීතිය ක‍්‍රියාත්මක කරන ලෙස සිය පැමිණිල්ල මගින් ඉල්ලා සිටි බවත් ඔහු සඳහන් කළේය.
 
මෙම අවස්ථාව සඳහා සත්‍ය ගවේෂකයෝ සංවිධානය, නීතීඥ නලීන් සමරකෝන්, නීතීඥ සමින්ද කෝනාර යන මහත්වරු ඇතුලු පිරිසක්ද එක් වූහ.