(කාංචන කුමාර ආරියදාස)

සාමාන්‍ය පෙළ විභාගයට පෙනී සිටීමට බස් රථයකින් යමින් සිටි  සිසුවකු බස් රථයෙන් ඇද වැටී ප්‍රතිකාර කර විභාගය ලිවීමෙන් පසුව නැවතත් රෝහල්ගත කර අැත.

දඹුල්ල වෑවල වැව මාර්ගයේ ගමන් කරමින්  තිබූ පෞද්ගලික බස් රථයක උදෑසන විභාගයට පෙනී සිටීම සඳහා සිසුවා කණ්ඩලම ප්‍රදේශයෙන් බස් රථයට නැග   ධාවනය වෙමින් තිබූ බස් රථයෙන් කණ්ඩලම පාර සිසිරවත්ත ප්‍රදේශයේදී  බිමට ඇද වැටී ඇතැයි පොලිසිය කියයි.

මෙම අනතුර සම්බන්ධයෙන් බස් රථය බස් රථයේ රියැදුරු බස් රථයේ කොන්දොස්තරවරයා සැකපිට අත්අඩංගුවට ගත් බව දඹුල්ල පොලීසිය පවසයි.

මෙසේ තුවාල ලබා ඇත්තේ  කණ්ඩලම ප්‍රදේශයේ පදිංචි සුපුන් මදුශංක  නැමති පාසල් සිසුවෙකි.

තුවාල ලැබූ සිසුවා එම බස් රථයෙන්ම දඹුල්ල මූලික රෝහලට රැගෙනවිත් තුවාලවලට බෙහෙත් දමා දඹුල්ල ජාතික පාසලේ විභාග මධ්‍යස්ථානයට පිටත් කර යැවූ බවත් රෝහල් ප්‍රකාශකයකු සඳහන් කළේය.

පසුව විභාගය අවසන් වූ පසු නැවතත්  රෝහලට ගෙන විත් ඔහුට ප්‍රතිකාර කටයුතු ආරම්භ කළ බව රෝහල් ප්‍රකාශකයකු වැඩිදුරටත් සඳහන් කළේය.

මෙම සිසුවාගේ අත්පා වලට සහ මූහුණට දැඩි හානි සිදු වී තිබෙන බවද  රෝහල් ප්‍රකාශකයා පැවසීය.

අත්අඩංගුවට ගත් සැකකරුවන් දෙදෙනා දඹුල්ල මහේස්ත්‍රාත් අධිකරණයට ඉදිරිපත් කිරීමට නියමිතය.