(ඩබ්. ඒ. පියතිලක)
 
හබරණ - ත්‍රිකුණාමල මාර්ගයේ  ස්ථාන දෙකකදී  රථවාහනවල ගැටී වනඅලි දෙදෙනෙකු අද(16) මියගොස් ඇති බව  කවුඩුල්ල ජාතික උද්‍යානයේ භාරකරු ප්‍රදිප් කුමාර හෙට්ටිආරච්චි මහතා කියයි.   
 
අනතුරෙන් මියගොස් ඇත්තේ වයස අවුරුදු  තුනක පමණ අලි පැටියෙකු සහ අවුරුදු 25 පමණ වන අලියෙකි.
 
හබරණ ත්‍රිකුණාමල මාර්ගයේ තලපත්කන්ද ප්‍රදේශයේ මාර්ගයේ ගමන් ගත්  ලොරි රථයක් අලි පැටවා මරණයට පත්කරමින් අනතුර සිදුකර පලා ගොස් තිබේ. 
 
එම මාර්ගයේම 134 -135 සැතපුම් කණු දෙක අතර ද ත්‍රිකුණාමලේ සිට  හබරණ දෙසට ගමන් ගත් සිමෙන්ති  පටවාගෙන රැගෙන යමින් තිබූ  විශාල ප්‍රමාණයේ ලොරි රථයක ගැටී අනෙක් අලියා මිය ගොස් ඇත.
 
නොසැලකිලිමත් රිය ධාවනය හේතුවෙන් වන අලි මරණට පත් වූ බව  ප්‍රදීප් මහතා පවසයි.
 
හබරණ පොලිසිය සිමෙන්ති ලොරි රථය සහ එහි රියදුරු අත්අඩංගුවට ගෙන ඇත.  
 
අත්අඩංගුවට ගත් ලොරි රථයේ  රියදුරු අධිකරණයට ඉදිරිපත් කිරීමට නියමිතය.