(රොමේෂ් මධුෂංඛ)

වවුනියාව, සන්නාසිපරන්තන් ප්‍රදේශයේ දී අද (6) වලස් ප්‍රහාරයකට ලක්ව ස‍හෝදරයින් දෙදෙනකු තුවාල ලබා රෝහල් ගත කළ බව වවුනියාව පොලීසිය පවසයි.

මෙම සහෝදරයින් දෙදෙනා ගවයින් නැවත නිවෙස වෙතට රැගෙන ඒම සඳහා සන්නාසිපරන්තන් ප්‍රදේශයේ කැළෑවට ගිය අවස්ථාවේදී එක්වරම කැලෑව තුළින් එක් සහෝදරයකුට පහරදී ඇති අතර එම සහෝදරයා බේරා ගැනීමට අනෙක් සහෝදරයා උත්සහා ගැනීමේ දී එම සහෝදරයා ද වලස් ප්‍රහාරයට ලක්ව ඇත.

වලස් ප්‍රහාරයෙන් තුවාල ලැබූ අවුරුදු 37, ක් හා 26 ක් වයසැති සහෝදරයින් දෙදෙනා වවුනියාව රෝහලට ඇතුළත් කර ඇති අතර, ඔවුන්ගේ සිරුරු පුරා තුවාල වී තිබුණද ඔවුන්ගේ තත්වය බරපතල නොවන බවට වාර්තා වේ.

මීට පෙර අවස්ථාවකදී ද වවුනියාව මල්මඩුව ගම්මානයට ඔබ්බෙන් වූ කැළෑවේ දර කැඩීමට ගිය කාන්තාවන් පිරිසක් ද වලස් ප්‍රහාරයට ලක්වූ අතර, එහිදී කාන්තාවන් තිදෙනෙකු තුවාල ලබා වවුනියාව රෝහලට ඇතුළත් කර තිබිණි.