සිතුම් චතුරංග
          
මුලතිව් - වවුනිකුලම් අභයභූමිය තුළ නීතිවිරෝධී අයුරින් වැලි කැණීම් සිදුකළ පුද්ගලයින් හයදෙනකු කිලිනොච්චිය දිසා දුෂණ මර්දන අංශයේ නිලධාරීන් කණ්ඩායමක් විසින් අත්අඩංගුවට ගනු ලැබීය.
 
වවුනිකුලම් අභය භූමියේ පාලිආරු ඇළෙහි ට‍්‍රැක්ටර් රථ යොදාගනිමින් වැලි කැණීම් සිදුකරන පිරිසක් පිළිබඳ කිලිනොච්චිය දිසා දූෂණ මර්දන අංශය වෙත ලැබුණු තොරතුරක් මත සිදුකළ වැටලීමකදී සැකකරුවන් හා වැලි ගොඩදැමීම සඳහා යොදාගත් උපකරණ සහිත ට‍්‍රැක්ටර් රථ තුනක් අත්අඩංගුවට ගත් බව පොලිසිය පැවසීය.
          
ප‍්‍රදේශීය ලේකම් කාර්යාල ඔස්සේ ව්‍යාජ තොරතුරු ලබාදී ලබා ගන්නා දෛනික වැලි කැණීම් බලපත‍්‍ර මත මෙම ජාවාරම සිදුකරගෙන ගොස් ඇති අතර ඇතැම් බලපත‍්‍ර අභය භූමියේ වැලි කැණීම් සිදුකිරීම සඳහා නම්කර තිබූ බවත් පවසයි.
          
වවුනිකුලම් අභය භූමියේ සිදුකළ වැලි ජාවාරම හේතුවෙන් සතුන්ට පානය කිරීම සඳහා ඇළ තුළ රැදී තිබූ විශාල ජල මුලාශ‍්‍ර සිඳී ගොස් ඇති අතර අසීමිත ලෙස වැලි කැණීම් සිදුකිරීම හේතුවෙන් අභය භූමියේ පරිසර පද්ධතියට දැඩි හානියක් සිදුව ඇති බවද පොලිසිය පවසයි.
 
සැකකරුවන් පිරිස විසින් ගොඩදමන වැලි යාපනය හා විවිධ ප‍්‍රදේශවලට ප‍්‍රවාහන කිරීම සඳහා හිමිකරුවන් නොමැති ඉඩම් තුළ ගබඩාකරන බවට තොරතුරු අනාවරණය වූ බව කීය.