අනීෂා මානගේ

වීරකැටිය පට්ටියපොළ ප්‍රදේශයේ බෞද්ධ පූජා භූමියක තිබූ අඩි දෙකහමාරක් පමණ උසැති බුදු පිළිම දෙකක් කිසියම් පිරිසක් විසින් විනාශ කර දමා ඇතැයි වීරකැටිය පොලිසිය කියයි.

වීරකැටිය පොලිස් බල ප්‍රදේශයට අයත් පට්ටියපොළ ප්‍රදේශයේ බෞද්ධයින් පුද පූජා පවත්වන පැරණි පූජා භූමියක තිබූ අඩි දෙකහමාරක් පමණ උසින් යුතු බුදු පිළිම දෙකක් මෙලෙස විනාශ කර දමා තිබේ.

බෝධිය අසල තිබූ බුදු පිළිම දෙක කඩා විනාශ කර අසල තිබූ වැවෙහි ඉවුර අසලට දමා ඇති ආකාරය දක්නට හැකි විය.

මෙම පූජා භූමියට වසර 90 කට ආසන්න කාලයක ඉතිහාසයක් පවතින බව ප්‍රදේශවාසීහු පවසති.  බුදු පිළිම තබා තිබූ ස්ථානයෙහි තිබූ මල් වට්ටි කිහිපයක් ද විසිකර දමා තිබූ ආකාරය දක්නට හැකි විය.

තංගල්ල සහකාර පොලිස් අධිකාරී එල්.ඒ.ඩී. රත්නවීර මහතා සිද්ධිය වූ පූජා භූමියට පැමිණි අතර ඔහු ගම්වාසීන්ට පැවැසූයේ මෙලෙස බුදු පිළිම විනාශ කර දමා ඇත්තේ යම් කිසි කඩාකප්පල්කාරී ක්‍රියා සිදුකරන පිරිසක් බවට සැක කරන බවයි. කෙසේ වුවද මේ පිළිබඳව විධිමත් පරීක්ෂණයක් සිදුකර සැකකරුවන් අත්අඩංගුවට ගැනීමට කටයුතු කරන බවද හෙතෙම කීවේය.