(පුෂ්පකුමාර මල්ලවආරච්චි)
 
විදේශ රටවල රැකියා දෙන බව කියා පුද්ගලයන්ගෙන් රුපියල් කෝටි තුනකට අධික මුදලක් වංචා කර,  සැගව සිටියදී අත්අඩංගුවට ගත් සංචාරක ව්‍යාපාරිකයකු දෙසැම්බර් 3 වැනිදා දක්වා රක්ෂිත බන්ධනාගාර ගත කරන ලෙද මීගමුව ප්‍රධාන මහේස්ත්‍රාත් රජින්ද්‍රා ජයසූරිය මහත්මිය අද(20) නියෝග කළාය.
 
මෙසේ රක්ෂිත බන්ධනාගාර ගතකළේ කටාන මිරිස්වත්ත දෙමන්හන්දියේ පදිංචි බව කියන  බ්‍රයන් බර්නාඩ් ඩේවිඩ් නමැති 57 හැවිරිදි අයෙකි.
 
විදේශ රැකියා ලබා දෙන බව පවසමින් මුදල් ලබාගත් 11 දෙනාට  ප්‍රංශ සහ ජපන් විසා ලබා දෙන බව පවසමින් සැකකරු ව්‍යාජ ලේඛන ලබාදී ඇතැයිද පොලිසිය අධිකරණයට දැන්වීය. එසේ ව්‍යාජ වීසා පත් ලබාදී ඇති සැකකරු කලක් තිස්සේ චීනයට පලාගොස් සැඟවී සිටඇත.
 
පසුගිය දිනක ඔහු බිරිඳ බැලීමට රහසිගතව යලි ලංකාවට පැමිණ ඇත. ඒ ගැන හෙලිදරව්වීමෙන් පසු  වංචාවට ලක්වූ පුද්ගලයන් මුල්වී  සැකකරු අල්ලා මීගමුව පොලිසියේ විශේෂ විමර්ශන ඒකකයට බාරදී  ඇත. අධිකරණයට ඉදිරිපත් කළ සැකකරුට ඇප ඉල්ලා සිටියත් ඇප ලබාදීම ප්‍රතික්ෂේප කළ මහේස්ත්‍රාත්වරිය සැකකරු මෙසේ බන්ධනාගාර ගත කිරීමට නියෝග කළාය.
 
මිගමුව පොලිසියේ උපපොලිස් පරීක්ෂක විජේරත්න මහතා පැමිණිල්ල මෙහෙය වූ අතර ජ්‍යෙෂ්ඨ නීතීඥ ඉන්දික ද සිල්වා මහතා අගතියට පත් පාර්ශවය වෙනුවෙන් පෙනීසිටියේය.