(දඹුල්ල කාංචන කුමාර ආරියදාස)
 
හබරන හිරිවඩුන්න ප්‍රදේශයේ විදුලි රැහැන් අදින පෞද්ගලික ආයතනයක සේවය කළ අයෙකු අනාරක්ෂිත විදුලි රැහැනක පටලැවී විදුලි සැර වැදී මියගොස් ඇතැයි හබරණ පොලීසිය කියයි.

මෙසේ මියගොස් ඇත්තේ ගලේවෙල පට්ටිවෙල ප්‍රදේශයේ පදිංචි එක්දරු පියෙකු වූ චාමර නුවන් බණ්ඩාර නැමැති අයෙකි.
පශ්චාත් මරණ පරීක්ෂණ කටයුතු වලින් අනතුරුව ඊයේ (13) පස්වරුවේ මියගිය චාමර නුවන් බණ්ඩාර මහතාගේ දේහය ඔහුගේ පියාගේ නිවසට නිවසට ගෙනවිත් තිබිණි .

මියගිය චාමර නුවන් බණ්ඩාර විදුලි කාර්මික  සේවය කරන අයෙකි . ඔහුට අවුරුදු 2ක දියණියක් සිටින අතර බිරිඳ දෙවැනි දරුවා ලැබීම සඳහා සූදානමින් සිටින බව ඥාතීහු කියති.

හබරන හිරිවඩුන්න ප්‍රදේශයේ මේ දිනවල අලුතින් දිකරමින් පවතින විදුලි රැහැන් ඇදීම සඳහා කණු සවිකිරීමේ කොන්ත්‍රාත්කරුවෙකු ලඟ මොහු සේවය කළ බව කියයි.

ඉතා අනාරක්ෂිත ලෙස වැඩබිමක වෙනත් නිවසකින් විදුලි රැහැන් ඇද යන්ත්‍රයක් ක්‍රියාත්මක කිරීම සඳහා සූදානම් කරමින් තිබියදී මෙම අනතුර සිදුවී තිබෙන බවත් ඉතා අනාරක්ෂිත ලෙස සේවකයන්ගෙන් වැඩ ගැනීම නිසා මෙම මරණය සිදු වූ බව පවුලේ ඥාතීහු චෝදනා කරති.

මියගිය චාමර නුවන් බණ්ඩාර මහතා ගේ  පියාවූ ටී .එම්. ජයරත්න මහතා කියා සිටියේ තම දරුවා විදුලි කාර්මික වැඩ සිදුකරන බවත් අනාරක්ෂිතව මෙවැනි වැඩවලට ඔහු නොඑන බවත්ය. කෙසේවෙතත් තම දරුවාගේ අසරණ වූ දරු පවුල පිළිබඳව අවධානය යොමු කරන්නැයි හෙතෙම ඉල්ලීමක් කළේය.

මියගිය චාමර, ප්‍රදේශයේ ආර්ථික දුෂ්කරතා මධ්‍යයේ ජීවත් වුවද ජනතාව සමඟ ඉතා සමීපව කටයුතු කළ අයෙකු බව ඔහුගේ ගම් ගම්වාසීහු කියති.
 
රටේ විදුලි බල අවශ්‍යතාවය සඳහා සිදුකෙරෙන සංවර්ධන කටයුත්තක කොන්ත්‍රාත්කරුවන්ගේ අනාරක්ෂිත ක්‍රියාවලිය නිසා චාමර  මිය ගිය බව ඔහුගේ මිතුරෝද චෝදනා කරති. ඔහුගේ දේහය පිළිබඳ අවසන් කටයුතු අද (14) සිදුකිරීමට නියමිතව තිබේ.