(බිමල් ශ්‍යාමන් ජයසිංහ)
 
වැටලීමකදී පොලිස් නිලධාරීන්ගේ රාජකාරියට බාධා කරමින් තර්ජනය කර පහරදීමට තැත් කළ පිළියන්දල මඩපාත නිවාඩු නිකේතනයක හිමිකරු සහ තවත් පුද්ගලයකු රුපියල් ලක්ෂ හතරක් වටිනා මත්පැන්  සමඟ අත්අඩංගුවට ගත් බව පානදුර වලාන මධ්‍යම දූෂණ මර්දන ප්‍රහාරක ඒකකය කියයි.
 
පෝය  සහ අනෙකුත් දිනවලද බාධාවකින් තොරව මෙම ස්ථානයෙහි වැඩි මිලට මත්පැන් අලෙවිකරන බවට ලද තොරතුරකට අනුව මෙම වැටලීම කළ බව පොලිසිය පවසයි.
 
එම ස්ථානයේ ගබඩා කර තිබූ මත්පැන් බෝතල් 102ක් සහ කෑන් 104ක් පොලිසිය බාරයට ගෙන ඇත.
 
මත්පැන් විකිණූ සේවකයා අත්අඩංගුවට ගෙන නිවාඩු නිකේතනය සෝදිසි කිරීමේදී එහි හිමිකරු පොලිස් නිලධාරීන්ට බාධා කරමින් පහරදීමට තැත් කළ බවද ඒ අනුව ඔවුන් දෙදෙනාම අත්අඩංගුවට ගත් බවද පොලිසිය කියයි.