(කේ. බුද්ධික කුමාරසිරි)
 
නුගේගොඩ පොලිස් අධිකාරී බල ප‍්‍රදේශයේ පොලිස් වසම් ගණනාවක නිවාසවල රුපියල් ලක්ෂ දහයකට ආසන්න වටිනාකමෙන් යුත් ගෘහ උපකරණ සොරකම් කිරීමේ යෙදුණු පුද්ගලයකු අද(17) භාණ්ඩ තොගයක් ද සමඟ සැකපිට අත්අඩංගුවට ගත් බව අතුරුගිරිය පොලීසිය පවසයි.
 
අතුරුගිරිය, තලංගම, නවගමුව ආදී පොලිස් වසම් ගණනාවක මෙලෙස නිවාස බිඳුම් සම්බන්ධයෙන් පැමිණිලි 23 ක් ලැබී තිබූ බවත් ඒ අනුව නුගේගොඩ පොලිස් අධිකාරීවරයාගේ උපදෙස් මත එම විමර්ශන කටයුතු අතුරුගිරිය පොලිසියේ විශේෂ විමර්ශන කණ්ඩායමකට භාර දුන් බවත් පොලිසිය පවසයි.
 
මෙවැනි ආකාරයේ සොරකම් සිදු කර තිබූ පුද්ගලයෙකු සැකපිට අත්අඩංගුවට ගෙන ප‍්‍රශ්න කිරීමේදී අදාළ සොරකම් සම්බන්ධයෙන් අනාවරණය වූ බවත් එලෙස සොරකම් කල භාන්ඩ තොගයක් ද, සොරකම් කල භාණ්ඩ ප‍්‍රවාහනය කල ත්‍රි රෝද රථයක් ද අත්අඩංගුවට ගැනීමට හැකි වූ බව පොලිසිය පවසයි.
 
සොරා ගත් භාණ්ඩ අතර සිමෙන්ති කොට්ට, ටයිල් කැට, වර්ණ රූපවාහිනී යන්ත‍්‍ර, ලැප්ටොප් පරිගණක, තණකොළ කපන යන්ත්‍ර, පිත්තල පහන්, ගෑස් සිලින්ඩර්, තීන්ත බැරල්, විදුලි පංකා ආදිය ඇතැයි පොලිසිය කියයි.
 
අත්අඩංගුවට ගත් 37 හැවිරිදි සැකකරු හෙරොයින් මත්කුඩු පානයට පුරුදුව සිටින අයෙකු බව අනාවරණය වී ඇත.
සැකකරු දිනපතා තම ත්‍රි රෝද රථයෙන් ගොස් දහවල් කාලයේදි මෙම සොරකම් සිදු කර ඇති බවත් ඔහු ඔහු කඩුවෙල ප‍්‍රදේශයේ කුලී නිවසක වාසය කර ඇති බවත් පොලිසිය පවසයි.
 
සැකකරු කඩුවෙල මහේස්ත‍්‍රාත් අධිකරණයට ඉදිරිපත් කිරීමට නියමිතය.