(එච්.එච් ධර්මපාල)

දෙහිවල සත්වෝද්‍යනයට අඩුවක්ව පැවැති ‘‘ජගුවර්‘‘ ගැහැණූ සත්වයෙක් නෙදර්ලන්තයේ ‘‘ආටිස් අව්ටුඩෑම් රෝයල්‘‘ සත්වෝද්‍යානයෙන් ගුවන් මගින් කටුනායක ගුවන්තොටුපල හරහා ඉකුත් ජූනි 22 ගෙනැවිත් මාසයක කාලයක් සත්ත්ව නිරෝධායනයට යොමු කර අද (23) මහජන ප්‍රදර්ශනයට මුදාහල බව නියෝජ්‍ය අධ්‍යක්ෂ අනෝමා ප්‍රියදර්ශණී මහත්මිය පැවැසුවාය.

මෙම ජගුවර් ගැහැණු සත්ත්වයා 2017 ජුනි 28 දින එම සත්වෝද්‍යානයේ උපත ලබා ඇත.දැනට අවුරුදු දෙකක් වන මෙම සත්ත්වයා ලොකයේ වඳවීමේ තර්ජනයට ලක්වී සිටින සත්ත්ව විශේෂයකි.

උපතින් මාංශ භක්ෂක වන අතර ආයු කාලය අවුරුදු 12 ත් 20 ත් අතර බවත් අවුරුදු 3 - 4 අතර කාලයේ ගැබ් ගැනීම සිදුවන බවත් දින 90 ත් 103 අතර කාලයකදී පැටවුන් දෙදෙනෙක් හො සිව් දෙනෙක් බිහිකරන බවත් නියෝජ්‍ය අධ්‍යක්ෂවරය සඳහන් කළාය.

ගැහැණු සත්ත්වයාගේ බර කිලෝ 70 ක් 100 අතර වන බවත් පිරිමි සත්ත්වයෙක් කිලෝ 100 ත් 130 ත් අතර වැඩෙනු බවත් නියෝජ්‍ය අධ්‍යක්ෂවරිය පැවැසුවාය.