(ජී.ඩබ්ලිව්.කේ.පේ‍්‍රමතිලක ද සිල්වා)

සෞඛ්‍ය ඇමැති රාජිත සේනාරත්න මහතාට එරෙහිව රජයේ වෛද්‍ය නිලධාරීන්ගේ සංගමය සංවිධානය කළ විරෝධතාවයක් ගාල්ල කරාපිටිය ශික්ෂණ රෝහල ඉදිරිපිටදී අද (14)  පැවැත්විණි.

කරාපිටිය, බලපිටිය, ඇල්පිටිය සහ උඩුගම යන රෝහල්වල රජයේ වෛද්‍ය නිලධාරීන්ගේ සංගමයේ වෛද්‍යවරු පිරිසක් මෙම අවස්ථාවට එක්ව සිටියහ.

මෙහිදී අදහස් දැක්වූ රජයේ වෛද්‍ය නිලධාරින්ගේ සංගමයේ කරාපිටිය ශික්ෂණ රෝහල් ශාඛාවේ සම ලේකම් වෛද්‍ය මංජුල ද සොයිසා මහතා මෙසේ පැවසීය.   

"අද වන විට සෞඛ්‍ය ඇමැතිවරයාගේ ක‍්‍රියා කලාපය හේතුවෙන් මුළු නිදහස් සෞඛ්‍ය ක්ෂේත‍්‍රයටම කඩා හැලෙන තත්වයකට පත්වෙලා. බාල ඖෂධ රෝගීනට ලබාදීම තුළින් ජනතාවගේ රජයේ සෞඛ්‍ය සේවාව සඳහා තිබූ  විශ්වාසය පළුදුවෙලා. ඒ මදිවට නෙවිල් ප‍්‍රනාන්දුගේ රෝහලට රුපියල් බිලියන 5 ක් ලබාදීලා.

මේ නිසා අපි කියන්නේ මෙම කරුණු ගැන නීතිය ක‍්‍රියාත්මක කර මෙම සෞඛ්‍ය ඇමැතිවරයාගේ ප‍්‍රජා අයිතිය අහෝසි කරන්න කියලා. රාජිත සේනාරත්න කියන්නේ මෙතෙක් ශ‍්‍රී ලංකාවේ සිටි දූෂිතම සෞඛ්‍ය ඇමැති කියල හඳුන්වන්න පුළුවන්."