රොමේෂ් මධුෂංඛ
 
යාපනය සරසවියේ විද්‍යා අංශයේ සිව්වැනි වසරේ සිසුන් සහ දෙවැනි වසරේ සිසුන් දෙපිරිසක් අතර ඇති වූ ගැටුමකින් දෙවැනි වසරේ සිසුන් තිදෙනෙකු තුවාල ලබා රෝහල් ගත කළ බව යාපන පොලිසිය පවසයි.

යාපනය කන්දර්මඩම් ප්‍රදේශයේ දී යාපනය සරසවියේ විද්‍යා අංශයේ සිව්වැනි වසරේ සිසුන් පිරිසක් විසින් දෙවැනි වසරේ සිසුන් පිරිසකට ඊයේ (11) රාත්‍රී 10 ට පමණ නවකවදය දීමට යාමේදී ඇති වූ බහින් බස් වීමක් දුර දිග යාමෙන් සිව්වැනි වසරේ සිසුන් විසින් දෙවැනි වසරේ සිසුන් වෙතට පහර දී තිබේ.

එහිදී යාපනය රෝහලේ 24 වාට්ටුවට ඇතුළත් කර ඇති 23 හැවිරිදි තුෂාර ඒකනායක, අතුකෝරල සහ සුරවීර යන අය විසින් පොලීසියට පවසා ඇත්තේ තමන්ට සිව්වැනි වසරේ සිසුන් විසින් පොලු මුගුරුවලින් පහරදුන් බවයි.

මේ අනුව පහරකෑමට ලක් වූ සිසුන් විසින් පහර දුන් සිසුන් කිහිප දෙනෙකු හඳුනාගෙන ඇති බවද ඔවුන්ට එරෙහිව නීතිය ක්‍රියාත්මක කරන ලෙසද පොලීසියෙන් ඉල්ලා ඇති අතර අදාළ පහරදීම සම්බන්ධයෙන් යාපනය පොලිසිය පරීක්ෂණ පවත්වයි.