(දයාරත්න ඇඹෝගම)
 
යාං ඔය පිටාරා ගැලීමෙන් කහටගස්දිගිලිය නිසා අද(05) ගම්මාන 20 ක පවුල් 4352ක් පීඩාවට පත්වී ඇතැයි කහටගස්දිගිලිය ප්‍රාදේශීය ලේකම් සුදර්ශන දිසානායක මහතා සඳහන් කළේය.
 
අධික ජල ගැල්මෙන් කුඹුරැ අක්කර 1500 කට අධික ප්‍රමාණයක් ජලයෙන් යටවී  ඇති අතර,කෝන්වැව, දෙමටවැව මාර්ග ජලයෙන් යටවී ඇත.
 
මෙම ගම්මානවල ජනතාවට යාමට ඒමට නොහැකි තත්වයක් උද්ගතව තිබූ බැවින් ගම්වාසීන්ගේ ගමනාගමනය සඳහා නාවික හමුදාව බෝට්ටු සහ ට්‍රැක්ටර් යොදවා තිබේ.
 
ප්‍රදේශයේ වැව් තුනකට හා නිවාස දෙකකටද හානි සිදුව ඇත.
 
ගමනාගමනයට අපහසුව ඇති නිසා මෙම ගම්මානවල පිහිටා ඇති අ.පො.ස සාමාන්‍ය පෙළ විභාග මධ්‍යස්ථාන සඳහා අවශ්‍ය ප්‍රශ්න පත්‍ර හෙට(06) බෝට්ටු මගින් යැවීමට කටයුතු කරන බවද ප්‍රාදේශිය ලේකම් සුදර්ශන සිල්වා මහතා පැවසීය.
 
කහටගස්දිගිලිය ප්‍රදේශයේ පවතින ගංවතුර තත්වය නිරීක්ෂණය කිරීම සහා අද(05) උතුරු මැද පළාතේ නව ආණ්ඩුකාර ධුරයේ වැඩ භාරගත් මහාචාර්ය තිස්ස විතාරණ මහතා එම ප්‍රදේශයේ චාරිකාවක නිරතවිය.
 
විපතට පත්වුවන් සඳහා අවශ්‍ය කඩිනම් සහන ලබාදීමට ක්‍රියාකරන ලෙස ආණ්ඩුකාරවරයා කහටගස්දිගිලිය ප්‍රාදේශීය ලේකම් සුදර්ශන දිසානායක මහතා ඇතුළු නිලධාරීන්ට උපදෙස් ලබාදුන්නේය.