(රංජිත් කරුණාවීර)

ලංකා ගමනාගමන මණ්ඩලයට අයත් මහියංගන ඩිපෝව මගින් අලුත්වැඩියා කටයුතු සඳහා පෞද්ගලික ආයතනයකට බාරදුන් එන්ජින්වලට පරණ කොටස් යොදා, අලුත් කොටස් දැමූ බව හැඟවෙන ලෙස තීන්ත ආලේප කර, ලක්ෂ ගණනින් බිල්පත් දමා සිදු කරන වංචාවක් සම්බන්ධයෙන් තොරතුරු හෙළිව  ඇතැයි ඩිපෝවේ කාර්මික සේවක පිරිසක් චෝදනා කරති.

ධාවනයට නුසුදුසු තත්වයේ පවතින එන්ජින් මහියංගණ ලංගම ඩිපෝව මගින් අලුත්වැඩියා කටයුතු සඳහා කොච්චිකඩේ පෞද්ගලික ආයතනයක් වෙත යොමු කරයි.

අවස්ථා කිහිපයකදීම අලුත් අමතර කොටස් වෙනුවට පරණ කොටස් යොදා, අලුත් අමතර කොටස් ලෙස පෙනීමට තීන්ත ආලේප කර, අලුතෙන් අමතර කොටස් යෙදු බවට බිල්පත් දමා මුදල් අයකරන බව මහියංගන ඩිපෝවේ කාර්මික නිලධාරීහු පවසති.

අවසන් වරට එහි ගෙනා එන්ජිම සඳහා ලක්ෂ 10 කට අධික මුදලක් බිල්පත් කර ඇති අතර ලක්ෂ 5ක අලුත් අමතර කොටස්වත් ඊට යොදා නොමැති බව ඔවුහු පෙන්වා දෙති.

මේ ආකාරයෙන් මහා පරිමාණ වංචා හේතුවෙන් ලංගමය කිසිදා ගොඩ ගත නොහැති තත්වයේ පවතින බව ඔවුහු කියති.

සියලු ඩිපෝවල දක්ෂ කාර්මික නිලධාරීන් සිටියදී, අමතර කොටස් ඩිපෝවට ගෙන්වා අලුත්වැඩියා කිරීමේ හැකියාව තිබියදී පෞද්ගලික අංශයේ සේවාව ලබාගැනීමට යාමෙන් මෙවැනි වංචා සිදුවන බවත්, විශාල මුදලක් වැය කර අලුත්වැඩියා කරන එන්ජින් අපේක්ෂිත දුර ධාවනය කිරීමට නොහැකිව, මහ මඟ බස් රථ කැඩී, මගීන් පීඩාවට පත්වන බවත් ඩිපෝවේ සේවක පිරිස පෙන්වා දෙති.

මෙවැනි වංචා හේතුවෙන් ලංගමය සදා බංකොලොත් වන බවත් සේවක පඩි ගෙවාගැනීමට නොහැකි ඉතිහාසයක් තිබූ බවත් පවසන සේවක පිරිස බලධාරීන්ගේ අවධානය යොමුවී මෙම වංචා නතර කරන ලෙස ඉල්ලා සිටිති.

මේ පිළිබඳව මහියංගන ඩිපෝ කළමණාකරුගෙන් විමසු විට ඔහු සඳහන් කළේ   “සේවකයන් මේ පිළිබඳව අප දැනුවත් කර තිබෙනවා. ඒ සම්බන්ධයෙන් අපි විධිමත් පරීක්ෂණයක් කරනවා”  යනුවෙනි.