(මොහොමඩ් ආසික්)

මහනුවර දිස්ත්‍රික්කයේ පීඩාවට පත් පවුල් 22 කට අයත් පුද්ගලයින් 98 දෙනෙකු ආරක්ෂිත ස්ථානවල රඳවා ඇති බව  මහනුවර  දිස්ත්‍රික් ආපදා කළමණාකරණ  මධ්‍යස්ථානය සඳහන් කරයි.

ආපදා කළමණාකරණ මධ්‍යස්ථායේ මහනුවර දිස්ත්‍රික් කාර්යාලය සඳහන් කරන්නේ  කුණ්ඩසාලේ ප්‍රාදේශිය ලේකම් කොට්ඨාසයේ රජවැල්ල උතුර ග්‍රාම නිලධාරි වසමේ ගල් පෙරළීමේ අවදානම හේතුවෙන් පවුල් 18 කට අයත් පුද්ගලයින් 70 ක්  ද,දොළුව  පුපුරැස්ස ග්‍රාම නිලධාරි වසමේ නායයෑමේ අවදානම හේතුවෙන්  පවුල් තුනකට  අයත් 23 දෙනෙකුද,  මිනිපේ හසලක ග්‍රාම නිලධාරී වසමේ ගල් පෙරළීමේ අවදානම හේතුවෙන් එක් පවුලක පස් දෙනෙකුද ඉවත් කිරීමට පියවර ගෙන ඇති බවය.

මෙසේ ඉවත් කළ පිරිස් අතරින් ආරක්ෂිත ස්ථාන තුනක පවුල්  හතරට අයත් පුද්ගලයින් 23 දෙනෙකු රඳවා සිටින බවත් තවත් පවුල් 19 කට  අයත් පුද්ගලයින් 75 දෙනෙකු ඥාති නිවෙස්වල පදිංචි වී සිටින බවයි. 

 මෙසේ අවතැන්ව ඇති සියලු දෙනාට අවශ්‍ය පහසුකම් මහනුවර දිස්ත්‍රික් ලේකම් කාර්යාලයේ සහ අදාළ ප්‍රාදේශිය ලේකම් කාර්යාලවල සහායෙන් ලබා දීමට පියවර ගෙන ඇති බවද ආපදා කළමණාකරණ මධ්‍යස්ථානය තව දුරටත් කියයි.