(මනෝජ් හර්ෂික)

මහ කන්නයේ වගා හානි වූ ගොවීන් සඳහා වන්දි මුදල් මේ වසරේ දෙසැම්බර් මාසයට පෙර ගෙවීමට හැකියාවක් ඇති බව කෘෂිකර්ම, ග්‍රාමීය ආර්ථික කටයුතු, වාරිමාර්ග සහ ධීවර හා ජලජ සම්පත් සංවර්ධන අමාත්‍ය පී.හැරිසන් මහතා අද(29) පැවසීය.

ගම්පහ දිස්ත‍්‍රික්කයේ 2018 යල කන්නයේ වගා හානි වූ ගොවීන් වෙනුවෙන් ගම්පහ සුමේධ විද්‍යාලයේ පැවැති වන්දි ප්‍රදානයට එක්වෙමින් අමාත්‍යවරයා මේ බව කීය.

එහිදී වැඩිදුරටත් අදහස් දැක්වූ අමාත්‍යවරයා මෙසේද කීය.
 
“2018 වසරේ සිට අපි පළමුවරට ගොවියාට රක්ෂණ වාරිකයක්වත් නොමැතිව අක්කරක් සඳහා වගා හානි වන්දිය ලෙස රුපියල් 40‚000 ක් ගෙවීමට සමත්වුණා. එවකට අක්කරයක හානි වන්දි මුදල පැවැතියේ රුපියල් 10,000 ක්. එයද හතරගුණයකින් ඒ කියන්නේ රුපියල් 40,000ක් දක්වා ගෙවන්නේ පළමුවරටයි. අපි දැනට ලංකාවේ හානිවූ වගාබිම් අක්කර 23‚366 සඳහා ගොවීන් 20‚366කට රුපියල් මිලියන 559 ක මුදලක් ගෙවා තිබෙනවා.

මම බලාපොරොත්තුවෙනවා 2018 - 2019 මහ කන්නයට අදාළව හානිවූ ගොවිබිමි වෙනුවෙන් වන්දි ප‍්‍රදානය කරන්න. ඒ සඳහා මුදල් වෙන්කිරීමට අවශ්‍ය කටයුතු මේ දිනවල අපි සකස් කරමින් පවතිනවා. ආසන්න වශයෙන් මහ කන්නයේ අක්කර 50‚000ක් සදහා ගොවීන් 30‚000ක් වෙනුවෙන් රුපියල් මිලියන 1‚100ක මුදලක් වැයවෙතැයි මම අපේක්ෂා කරනවා. එම වගාහානි මුදල ද අපි විසින් ලබා දීමෙන් ඉතිහාසගත වන්නේ ගොවියාට වගාහානි වන්දි කඩිනමින්ම ලබාදුන් පළමු රජය ලෙස අප එක්වෙමින්”යැයි අමාත්‍යවරයා සඳහන් කළේය.