(ක.ග.කරුණාරත්න සහ ඩබ් ඒ පියතිලක)
 
වේලන ලද මුව මස් කිලෝ 5ක් සහ බෝර 12 පතරොම් තුවක්කුවක් සමඟ පුද්ගලයකු අද(04) අංගමැඩිල්ල ජාතික වනෝද්‍යානයේදී අත්අඩංගුවට ගත්බව වන ජීවී නිලධාරීහු කියති.

ටී 56 ජීව  උණ්ඩ 63ක් , බෝර 12 තුවක්කුවට භාවිත කරන පතුරම් 10ක් , හක්කපටස් 3ක් සහ යුද හමුදා ඇඳුමක් ඇතුළු උපකරණ රැසක් ද ඔහු සතුව තිබී හමු වී ඇත.

වනජීවී නිලධාරීන්ට ලැබුණු තොරතුරක් මත නිකවැව වනජීවී කාර්යාලයේ නිලධාරීන් කණ්ඩායමත් මෙම වැටලීම කර තිබේ. එම අවස්ථාවේ ටී 56 අවියක් අතතිව  පුද්ගයෙකු ඇතුළු තිදෙනෙකු පලාගිය බවත්  එහි සිටි එක් පුද්ගලයෙකු  පලා යන අවශ්ථාවේ ලුශුබැද ගොස් අත්අඩංගුවට ගෙන ඇත.
 
ජංගම දුරකථන 5ක්, විදුලි පන්දම් 5ක්, බයිසිකල් බෝල 100ක්, වැහි ආවරණයක් ද නිලධාරීන් බාරයට ගෙන තිබේ. 
 
අත්අඩංගුවට ගත් පුද්ගලයා ජයන්තිපුර ට්‍රැක් 07 ප්‍රදේශයේ  පදිංචි පුද්ගලයෙකු බවත් පලාගිය පුද්ගලයින් ද ජයන්තිපුර ප්‍රදේශයේ පදිංචිකරුවන්  බවද වන සතුන් දඩයම් කර මස් විකිණීමේ ජාවාරමක නියුතු අය බවද, විමර්ශනවලදී හෙළිවූ බව එම නිලධාරීහු පැවැසූහ.
 
අත්අඩංගුවට ගත් සැකකරු ඇතුළු උපකරණ (05)  පොළොන්නරුව අධිකරණයට  ඉදිරිපත් කරන බව වනජිවි නිලධාරීහු පවසති.

 සෙසු පිරිස අත්අඩංගුවට ගැනීම සඳහා පරීක්ෂණ ආරම්භ කර ඇතැයි එම නිලධාරීහු කීහ.

(ඡායාරූප - ඩබ්. ඒ. පියතිලක)