(එස්. ඩී. කොඩිකාර )
 
අකුරැස්ස තලහගම හරහා මාකඳුර මාර්ගය වසර  10කට අධික කාලයක් ප්‍රතිසංස්කරණය  නොකරන බව පවසමින් ගම්වාසීන් 300ට අධික  පිරිසක් අද (26) අකුරැස්ස  තලහගම මාර්ගය නාගහ  අසළ මංසන්ධිය මුළුමණින්ම අවහිර කර උද්ඝෝෂණයක නිරත වූහ.
 
පෝරතොට  පාසල ආසන්නයේ සිට  කිතුල්ඇල්ල  වත්ත දක්වා කිලෝමීටර් 6 ක පමණ දුරක්  වසර 10කට අධික කාලයක් තිස්සේ ප්‍රතිසංස්කරණය නොකළ හෙයින්  මාර්ගයේ විශාල වළවල් සෑදී ගමන් කිරීමට නොහැකි තත්ත්වයක් උදාවී ඇති බව ඔවුහු පැවසූහ.
 
ප්‍රදේශවාසීයෙකු වූ තිලක් ඒකනායක මහතා මෙසේ පැවසීය. 
 
“මෙම මාර්ගය දකුණු පළාත් මාර්ග සංවර්ධන අධිකාරියට අයත් මාර්ගයක්. මේ වනවිට මාර්ගයේ ගමන් කිරීමට නොහැකි තරම් වළවල් සෑදී තිබෙනවා. දිනකට පාසල් පාසැල් ළමුන් 300කට අධික ප්‍රමාණයක් මෙම මාර්ගයේ ගමන් කරනවා. මුලටියන, අතුරලිය ප්‍රාදේශීය ලේකම් කොට්ඨාස දෙකටම මෙම මාර්ගය අයත්වෙනවා වගේම මෙයින් අකුරැස්ස මාවරල, කඹුරුපිටිය පොලිස් වසම් තුනක් ආවරණය වනවා. බලධාරීන්ට කියා බැරිම තැන තමයි ගම්වාසීන් උද්ඝෝෂණය කරන්න පටන් ගත්තේ. අද අපි බලධාරියකු පැමිණ විසඳුමක් ලබාදෙනතුරු දිගටම මේ උද්ඝෝෂණය කරගෙන යනවා ” යැයි ඔහු පැවසීය.