(සිරාජ් හසීම්)

දෙමළ ජාතික සන්ධානය විසින් ජයග්‍රහණය කළ මාන්තෙයි නැගෙනහිර ප්‍රාදේශීය සභාවේ සභාපතිවරයා වශයෙන් සමස්ත ලංකා මහජන කොංග්‍රසයේ මහාලිංගම් දයානන්දන් මහතා එක්  වැඩි ඡන්දයෙන් තේරී පත්විය.

මේ සදහා පැවති ඡන්ද විමසුමේදී දෙමළ ජාතික සන්ධානයේ සී.සෙන්දුරන් මහතාට එම සන්ධානයේ   ඡන්ද හය පමණක්  හිමිවූ අතර දයානන්දන් මහතාට ඡන්ද හතක් හිමිවිය.

මේ අනුව සමස්ත ලංකා මහජන කොංග්‍රසයේ මහාලිංගම් දයානන්දන් මහතාට එම කොංග්‍රසයේ ඡන්ද හතරක්, ශ්‍රීලංකා නිදහස් පක්ෂයේ ඡන්ද දෙකක් සහ ඊ.පී.ඩී.පී පක්ෂයේ ඡන්ද එකක් වශයෙන් ඡන්ද හතක් හිමිවිය.

මෙම සභාවේ උප සභාපතිවරයා වශයෙන් තේරී පත්වූයේ ශ්‍රී ලංකා නිදහස් පක්ෂයේ ආර්.සින්දුජන් මහතාය. ඔහුටද ඡන්ද හතක් හිමිවූ අතර ප්‍රතිවාදී අපේක්ෂක දෙමළ ජාතික සන්ධානයේ සී.රාජේස්වරී මහත්මියට හිමිවූයේ එම සන්ධානයේම ඡන්ද හය පමණි.

සභිකයින් 13 දෙනෙකුගෙන් යුත් මාන්තෙයි නැගෙනහිර ප්‍රාදේශීය සභාව දෙමළ ජාතික සන්ධානය ජයගත් අතර එම සන්ධානයේ නියෝජිතයින් හය දෙනෙකුත්,සමස්ත ලංකා මහජන කොංග්‍රසයේ නියෝජිතයින් සිව් දෙනෙකුත්, ශ්‍රී ලංකා නිදහස් පක්ෂයේ නියෝජිතයින් දෙදෙනෙකුත්, ඊ.පී.ඩී.පී පක්ෂයේ එක් නියෝජිතයකුත් තේරී පත්විය.