(කවිතා සුබසිංහ) 

මාධ්‍යවේදීන්ට පහර දීම හා අයුතු අවහිරයක් සිදුකිරීමේ සිද්ධියක් සම්බන්ධයෙන් රිමාන්ඩ් භාරයේ සිට  අධිකරණයට ඉදිරිපත් කළ සැකකරුවන් දෙදෙනෙකු රුපියල්  2000 ක මුදල් ඇප සහ ලක්ෂ දෙක බැගින් වු ශරීර ඇප දෙකක්  මත මුදා හැරීමට මහර ප්‍රධාන මහේස්ත්‍රාත් හේශාන්ත ද මැල් මහතා අද(12) නියම කළේය. 

එම්.වී හශාන් තාරුක සහ වජිර ලසන්ත කැප්පෙටිපොළ නැමති සැකකරුවන් දෙදෙනකු මෙලෙස ඇප මත මුදා හැරිණ.

ජලයට ප්‍රෙට්‍රල් මුසු වීමක් සම්බන්ධයෙන්  කඩවත ප්‍රදේශයේ පිහිටි ඉන්ධන පිරවුම් හලකින් තොරතුරු විමසීමට ගිය  මාධ්‍යවේදීන් පිරිසකට බාධාකරමින් පහරදීමක් සම්බන්ධයෙන් ඉකුත් 10 වෙනිදා මාධ්‍යවේදීන් කඩවත පොලිසිය වෙත පැමිණිලි කර තිබුණි. ඒ අනුව සිද්ධිය සම්බන්ධයෙන් කඩවතදී සැකකරුවන් දෙදෙනකු අත්අඩංගුවට ගෙන 11 වැනි දා මහර මහේස්ත්‍රාත් අධිකරණය වෙත ඉදිරිපත් කිරීමේන් පසුව අද(12) දක්වා රිමාන්ඩ් ගත කර තිබූ අතර අද දින නඩුව කැඳවු අවස්ථාවේ දී සැකකරුවන් මෙලෙස ඇප මත මුදා හැරිණ.

ලබන මාර්තු මස 25 වැනි දා නඩුව නැවත කැඳවීමට ද මහේස්ත්‍රාත්වරයා නියම කළේය.

අගතියට පත් පාර්ෂවය වෙනුවෙන් නීතිඥ සුදර්ශන වික්‍රමරත්න මහතා ද විත්තිය වෙනුවෙන් නීතිඥ අතුල එස් රනගල මහතා ද පෙනී සිටියහ. කඩවත පොලිසියේ පොලිස් සැරයන් (18899) පණ්ඩිතරත්න නිලධාරියා විසින් පැමිණිල්ල මෙහෙයවන ලදී.