(බිමල් ශ්‍යාමන් ජයසිංහ)

නාරාහේන්පිට පැවති පොලිස් ජල ක්‍රීඩා සංකීර්ණයේදී රුපියල් දොළොස් දහසක් සහිත තම මුදල් පසුම්බිය කිසියම් අයකු සොරාගෙන ඇති බවට අපරාධ පරීක්ෂණ දෙපාර්තමේන්තුවේ කොස්තාපල්වරයෙකුගෙන් පැමිණිල්ලක් ලැබී ඇතැයි නාරාහේන්පිට පොලීසිය කියයි. 

එම මුදල් පසුම්බිය තුළ අපරාධ පරීක්ෂණ දෙපාර්තමේන්තුව මගින් නිකුත් කළ තාවකාලික අවසර පත්‍රය, ජාතික හැඳුනුම්පත, රියැදුරු බලපත්‍රය හා තවත් ලිපි ලේඛන තිබූ බව පොලිස් කොස්තාපල්(90163) ටිකිරි බණ්ඩාර ලහිරු ගිම්හාන විජේසිංහ මහතා කරන ලද පැමිණිල්ලේ සඳහන් වේ.

දහවල් 11ට පමණ පොලිස් ජල ක්‍රීඩා සංකීර්ණයේ පැවති සේවය ස්ථිර කිරීමේ පරීක්ෂණයේ පිහිනුම් පරීක්ෂණයට සහභාගී වීම සඳහා ඔහු හැඳසිටි අංක 2 දරණ නිල ඇඳුම නිලධාරීන්ගේ ඇඳුම් මාරු කරන කාමරයේ එල්ලා තබා පිහිනුම් ඇඳුම හැදගෙන පොලිස් හැඳුනුම්පත පමණක් රැගෙන පරීක්ෂණයට පෙනී සිටීමට පිටවී ගිය බව කොස්තාපල්වරයා කරන ලද පැමිණිල්ලේ සඳහන් වේ.

අනතුරුව දහවල් එකොළහ පසුවී විනාඩි පහලොවකට පමණ පසු ඇඳුම් එල්ලා තිබූ කාමරයට පැමිණ බලද්දී කලිසම් සාක්කුවේ තිබූ මුදල් පසුම්බිය කිසිවකු සොරාගෙන ගොස් ඇති බව කොස්තාපල්වරයා පොලිසියට පවසා ඇත.

සිද්ධිය සම්බන්ධයෙන් නාරාහේන්පිට පොලිසිය පරීක්ෂණ පවත්වයි.