(විනීතා එම් ගමගේ)
            
මීතොටමුල්ල කසළ කන්ද ආශ්‍රිතව පැන නැගී ඇති පාරිසරික සහ සෞඛ්‍ය ගැටලු හේතුවෙන් පීඩාවට පත්ව සිටින, ඒ ආසන්නයේ ජීවත් වන, අවධානය යොමු විය යුතු තවත් පවුල් 141ක පිරිසක් සිටින බව සර්වෝදය ව්‍යාපාරය කියයි. 
            
ගංවතුරකට විනාශ වූ නිවාස වෙනුවට කුණු  කන්දේ එක් පසෙක සර්වෝදය ව්‍යාපාරයෙන් ඉදිකර දුන් තාවකාලික නිවාසවල මෙම පවුල් වෙසෙති. 
 
පසුගිය සමයේ කසළ කන්ද නායයාමෙන් මෙම නිවාසවලට හානියක් නොවීම නිසා මේ පිරිස පිළිබඳව කිසිදු අංශයක අවධානය යොමු වූයේ නැතැයි සර්වෝදය කොළඹ දිස්ත‍්‍රික් සංවිධානය පෙන්වා දෙයි. 
            
උද්‍යානයක් නිර්මාණය කිරීම සඳහා කසළ කන්දේ ඉදිකිරීම් කටයුතු සිදුවන බවද, මේ හේතුවෙන් නිරන්තර නැගෙන මීතේන් වායුවෙන් මෙම පෙදෙස බරපතල ලෙස වායු දූෂණයට ලක්ව ඇති බවද, අධ්‍යයනයකින් හෙළි වී ඇතැයි සර්වෝදය කොළඹ දිස්ත‍්‍රික් සංවිධායක ඉඳුනිල් ප‍්‍රසංග හිත්තැටිය මහතා ලංකාදීපයට පැවැසීය.
 
මෙම ප්‍රදේශයේ වෙසෙන තරුණ පිරිස අතරින් 85% ක් පමණ දෙනා මත්ද්‍රව්‍යවලට ඇබ්බැහි වී ඇති බව එම අධ්‍යයනයේ දී හෙළිවූ බව කී හිත්තැටිය මහතා මන්දපෝෂිත දරුවන් හා අඩු බර දරුවන් ද මෙහි බහුලව සිටින බව කියා සිටියේය. 
 
එහි බොහෝදෙනෙකුට වැසිකිළි පහසුකම් නොමැති අතර පවතින වැසිකිළි  පවා ඇළ මාර්ගවලට හරවා ඇතැයි පෙන්වා දුන් සර්වෝදය සංවිධායකවරයා වැඩිහිටියන් මෙන්ම දරුවන්ද බොහෝ පිරිසක් චර්ම රෝගවලින් පීඩා විඳින බව ද සඳහන් කළේය. 
            
උද්‍යානයේ ඉදිකිරීම්වලට පෙර සිදුවිය යුතුව තිබුණේ මෙම පවුල් 141 එතැනින් ඉවත් කර සුදුසු තැනක පදිංචි කරවීම බවත් හෙතෙම තවදුරටත් කියා සිටියේය.