(සම්පත් ප්‍රියනන්දන)

බලන්ගොඩ නගරසභා සීමාවේ ඩෙංගු පැතිරීමේ අවදානමක් මතුව ඇතැයි බලන්ගොඩ මහජන සෞඛ්‍ය පරීක්ෂක  බී. එල්. කේ. ලාලිත කුමාරසිංහ මහතා පවසයි.

මෙම අවදානම වැඩි වශයෙන් පවතින්නේ රාජ්‍ය සහ පෞද්ගලික ආයතන ඉදිකිරීම් කේෂ්ත්‍ර, පාසල් සහ පන්සල් ආශ්‍රිතව බව හඳුනාගෙන  තිබෙන බව ඒ මහතා පැවැසීය.

ඩෙංගු මදුරුවන් බෝවීම පාලනය කිරීම සඳහා සෑමවිටම සෞඛ්‍ය අංශ විසින් සහ මහජන සෞඛ්‍ය පරීක්ෂක නිලධාරීන් ලබාදෙන උපදෙස් අනුගමනය  කිරීම සඳහා ජනතාව වගබලා ගතයුතු බව කුමාරසිංහ මහතා පැවැසීය.

එම උපදෙස් ඇතැම් ආයතනවල නිලධාරීන් මෙන්ම ජනතාව  නොසලකාහැරීම හේතුවෙන්  ඩෙංගු මදුරුවන් බෝවීම පාලනය කිරීමට නොහැකිවීමෙන් නගර සභා සීමාවේ ඩෙංගු මදුරුවන් බෝවන ස්ථානය  ඉහළ ගොස් ඇති බවද හෙතෙම කීය.

මේ හේතුවෙන් ඩෙංගු රෝගීන්ගේ ඉහළ යෑමක් වාර්තා වෙමින්  පවතින බවත්  ලබාදෙන උපදෙස් අනුගමනය නොකර පුද්ගලයන්ට එරෙහිව නිවේදන  නිකුත්  කිරීමට  මෙන්ම  නඩු  පැවරීමට  කටයුතු  කරන බවද මහජන සෞඛ්‍ය පරීක්ෂක නිලධාරීවරයා වැඩිදුරටත් පැවැසීය.