(උපුල් තම්මිට)
 
ලංකාදීප එසැණ වෙබ් අඩවියේ පසුගිය ඔක්තෝබර් 08 වැනිදින “උතුරුමැද පාසැලක දරුවෝ පොල්අතු මඩුවල උගනිති ” යන ප්‍රවෘත්තිය පළවීමත් සමඟ සිසුන්ට අවශ්‍ය ගොඩනැගිල්ලක් ඉදිකර දීමට ඩුබායි රාජ්‍යයේ සේවය කරන රුචිර කුලතිලක මහතා ඉදිරිපත් වී තිබේ.
 
ඒ මහතා ශ්‍රී ලංකාවේ වාසය කරන ඔහුගේ හිතවතකු වන මහේෂ් පෙරේරා මහතාට මේ බව දැනුම් දී ඇති අතර ඔහු පසුගිය ඔක්තෝබර් (21) දා ගලෙන්බිදුනුවැව හිඹුටුගොල්ලෑව විදුහලට පැමිණ එහි විදුහල්පතිනිය වන සන්ධ්‍යා කුමාරසිංහ මහත්මිය හමුවී නව ගොඩනැගිල්ල ඉදිකිරීම පිළිබඳව සාකච්ඡා කර තිබේ.
 
එම තොරතුරු ඩුබායි රාජ්‍යයේ සේවය කරන රුචිර කුලතුංග මහතාට දැනුම්දීමෙන් අනතුරුව පසුගිය නොවැම්බර් (30) දා මහේෂ් පෙරේරා මහතාගේ ප්‍රධානත්වයෙන් නව ගොඩනැගිල්ලට මුල්ගල තැබිණ.
 
නව ගොඩනැගිල්ල පංති කාමර හතරකින් සහ එම විදුහලට අඩුපාඩුවක්ව පැවති වේදිකාවකින්ද සමන්විතය.
 
රුචිර කුලතුංග මහතා අද (15) අලුයම ශ්‍රී ලංකාවට පැමිණි හිඹුටුගොල්ලෑව විදුහලේ ඉදිවන නව ගොඩනැගිල්ල නිරීක්ෂනය කිරීමට පැමිණි අතර එහිදී ඒ මහතා පවසා සිටියේ ලංකාදීප එසැණ වෙබ් අඩවිය මගින් නිරන්තරවම ශ්‍රී ලංකාව පිළිබඳ දැනුවත්වන බවත් මෙම පුවත දැකීමත් සමඟ තමන් ඇතුලු හිතමිතුරන් බලවත් කම්පාවට පත්වූ බවත් පැවසීය.
 
හිඹුටුගොල්ලෑව විදුහලට ගොඩනැගිල්ලක් ඉදිකර දීම සඳහා ඩුබායි හි සේවය කරන  තම හිතමිතුරන් මේ සඳහා දායකත්වය ලබා දීමට කැමැත්ත පළකළ බව ඒ මහතා සඳහන් කළේය.
 
මෙම ගොඩනැගිල්ල ඉදිකිරීම සදහා රුපියල් ලක්ෂ විසිපහක් ඇස්තමේන්තු කර ඇති බවත් ලබන ජනවාරී මාසයේදී නව ගොඩනැගිල්ල සිසු අයිතියට පත්කරන බවත් ඒ මහතා සඳහන් කළේය.
 
රුචිර කුලතිලක මහතා හිඹුටුගොල්ලෑව විදුහලයේ ඉගෙනුම ලබන සිසු දරුවන්ට පාවහන් ඇතුලු ත්‍යාග රැසක්ද අද පිරිනැමීමට කටයුතු කළේය.