(දයාරත්න ඇඹෝගම)
 
පුරාවිද්‍යා දෙපාර්තමේන්තුවේ මුරකරුවන්ගේ අධීක්ෂණ නිලධාරියාගේ නිවසට සහ මෝටර් රථයට ගල් ගසා අලාභ හානි කළ මුරකරුවන් දෙදෙනෙකු අත්අඩංගුවට ගත් බව අනුරාධපුර පොලිසිය කියයි.
 
අත්අඩංගුවට ගෙන ඇත්තේ පුරාවිද්‍යා දෙපාර්තමේන්තුවේ සේවය කළ කේ. ටී. එස්. විජේසුරිය සහ ප්‍රමෝද් මධුෂික යන දෙදෙනාය.
 
මෙම මුරකරුවන් ගල් මුල්වලින් පහරදී ඇත්තේ අනුරාධපුර, පුජා නගරයේ අංක 05 කලාප කාර්යාලයේ සේවයේ නියුතු ආර්. එම්. රාමනායක මහතාගේ පෙරමියන්කුලම පිහිටි නිවසටය.
 
පසුගිය 08 වැනි දින මොවුන් දෙදෙනා බීමත්ව සේවයට පැමිණි අවස්ථාවේදි මෙම නිලධාරියා ඔවුන්ව ආපසු හරවා වා ඇතැයිද ඊට විරෝධය පළ කරමින් මෙම අලාභ හානි කර ඇතැයිද පොලිසිය කියයි.
 
මොවුන් දෙදෙනා එම අලාභය වශයෙන් රුපියල් 20,000ක මුදලක් අද(11) පැමිණිලිකරුට ගෙවා පොලිසියේදී සමතයකට පත්වූ බව අනුරාධපුර පොලිසිය වැඩිදුරටත් පවසයි.