(අතුල බණ්ඩාර)

අවුරුදු 14 යි  මාස තුනක් වයසැති පිරිමි ළමයෙකුව වසර දෙකක් තිස්සේ ලිංගික අපයෝජනයට යොදාගත් , දේවාලයක් පවත්වා ගෙන යන 37 හැවිරිදි කපුවෙකු අත්අඩංගුවට ගත්  බව මිහින්තලේ පොලිසිය පවසයි.

මිහින්තලේ පොලිස් ස්ථානාධිපති පොලිස් පරීක්ෂක ප්‍රසාද් සිරිවර්ධන මහතාට ලැබුණු තොරතුරක් අනුව ඉකුත් 17 වැනිදා සැකකාර කපුවා අත්අඩංගුවට ගෙන තිබේ.

සිදුකළ මුලික විමර්ශන වලදී කාලි මෑණියන්ගේ දේවාලයක් පවත්වා ගෙන යන මිහින්තලේ, කපුවා පදිංචි නිවසේදී මේ පිරිමි දරුවා ඔහු විසින් දෙවසරක කාලයක සිට ලිංගික අපයෝජනයේ යොදාගෙන තිබෙන බව අනාවරණය වී තිබිණි.

කපුවා පදිංචි නිවස කිට්ටුව නිවසක මේ පිරිමි ළමයා පදිංචිව සිටින බවත්, කපුවාගේ උපදෙස් මත ළමයා මෙය රහසක් ලෙස තබාගෙන සිට ඇති බවත් මුලික පොලිස් විමර්ශන වලදී තහවුරුවී ඇත.

කපුවා අත්අඩංගුවට පත්වූ පසු ළමයා ,දෙවසරක් තිස්සේ කපුවා තමන්ට කළ කී සියල්ල පොලිස් නිලධාරීන් හමුවේ හෙළිකර තිබේ.

ඒ අනුව ළමයාගේ මව ඒ සම්බන්ධයෙන් පරීක්ෂණයක් පවත්වන ලෙස ඉල්ලා මිහින්තලේ පොලිසියට පැමිණිල්ලක්  කර ඇත.

අත්අඩංගුවට ගත මේ සැකකාර කපුවා අනුරාධපුර මහේස්ත්‍රාත් අධිකරණයට ඉදිරිපත් කිරීමට පියවර ගෙන තිබුණි.