(මොහොමඩ් ආසික්)

පෙම්වතියගේ අසභ්‍ය  දර්ශන අන්තර්ජාලයට මුදා හරින බවට තර්ජනය කරමින් ඇයගේ පෙම්වතා වූ රජයේ සේවකයකුගෙන්  කප්පම් ගැනීමට උත්සාහ කළ කාර්මික විද්‍යාලයක ඉගෙනුම ලබන සිසුන් දෙදෙනකු කොටු කර ගැනීමට කටුගස්තොට පොලීසිය සමත්ව තිබේ.

රජයේ ආයතනයක සේවය කරන තරුණයෙකු අම්පාර ප්‍රදේශයේ තරුණියක සමඟ පෙම් සබඳතාවයක් පවත්වාගන ගොස් ඇති අතර තරුණියගේ දුරකථන අංකය පෙම්වතාගේ මිතුරකු විසින් ඔහුගේ මිතුරකුට ලබා දී තිබේ.  ඉන් පසුව එම තරුණියට මෙම තරුණයාගෙන් දිගින් දිගටම මිස් කෝල් ලැබෙන බවට පෙම්වතිය විසින් පෙම්වතාට දැනුම් දී ඇති අතර පෙම්වතා එම අංකයට ඇමතුමක් ගෙන මේ ගැන විමසා තිබේ. එහිදී  එම තරුණයා ප්‍රකාශ කර ඇත්තේ මෙම තරුණියගේ අසභ්‍ය දර්ශන තමන් සතු  බවත් ඒවා අන්තර්ජාලයට මුදානොහැරීමට නම් කප්පමක් ලබා දෙන ලෙසත්ය. මේ  ගැන බියට පත්ව ඇති පෙම්වතා වහාම  කටුගස්තොට පොලීසියට ගොස් පැමිණිල්ලක් කර ඇති අතර එම පැමිණිල්ල සටහන් කරන අවස්ථාවේදීත් මෙම තර්ජනාත්මක දුරකථන ඇමතුම ලැබී තිබේ. ඒ අනුව පොලිසිය ඒ මොහොතේම ක්ෂණිකව සහ සූක්ෂම ලෙස මෙම කප්පම් කල්ලිය වැටලීමට සැලසුමක් සකස් කර ඇති අතර කප්පම ලබා දීමට කැමැත්ත ප්‍රකාශ කර කප්පම්කරුවන් කටුගස්තොට නගරයේ එක්තරා ස්ථානයට ගෙන්වා ගෙන ඇත.

පසුව කප්පම්කරුවන් ස්ථානය වෙනස් කර වෙනත් ස්ථානයකට පැමිණෙන ලෙස දන්වා ඇති අතර සිවිල් ඇඳුමින් සැරසුණු පොලිස් නිලධාරීන් එහි ගොස් කප්පම්කරුවන් අත්අඩංගුවට ගනු ලැබූහ.

සැකකරුවන් වයස අවුරුදු 17 හා 20 යන වයස්වල පසුවන කාර්මික විද්‍යාලයක ඉගෙනුම ලබන කටුගස්තොට ප්‍රදේශයේම පදිංචි  සිසුන් දෙදෙනකු බව අනාවරණය වී තිබේ. මොවුන් ප්‍රකාශ කළ  ආකාරයට  එම තරුණියගේ කිසිදු අසභ්‍ය දර්ශනයක් ඔවුන් සතුව නොමැති බවද අනාවණය වී ඇති අතර එම තරුණිය හා ඔවුන් අතර කිසිදු හැඳුනුම්කමක් හෝ නොමැති බවද හෙළිවී තිබේ.