(දිනේෂ් උපේන්ද්‍ර)
            
යුද හමුදාව පොලිසිය හා ඒකාබද්ධව පන්නල බම්මන්න ප‍්‍රදේශයේ දී අද (23) කළ සෝදිසි මෙහෙයුමකදී කඩු, ඇමෝනියා හා විදෙස් ගමන් බලපත් තොගයක් සමඟ සැකකටයුතු භාණ්ඩ රැසක් සමගින් සැකකටයුතු පුද්ගලයන් සිව් දෙනෙකු අත්අඩංගුවට ගත් බව පොලිසිය පවසයි.
 
බම්මන්න මුස්ලිම් පල්ලිය අසල නිවාස කිහිපයකදී මෙම භාණ්ඩ තොගය සොයා ගැනීමට හැකී වී තිබේ.

විදෙස් ගමන් බලපත් 15 ක්, අඩි 3ක් පමණ උසින් යුතු විශාල ප‍්‍රමාණයේ කඩු 2ක්, වීසා කාඩ් 5 ක් හිමිකරුවන් නොමැති හැඳුනුම්පත් 2 ක් විදෙස් ගමන් බලපත් සමඟ ගමන් බලපත් 2ක්, යුද හමුදා ඇඳුමට සමාන ඇඳුම් 2 ක් ජංගම දුරකථන 10ක් සිම්පත් 10ක් හා ඇමෝනියා කිලෝ 25 බැගින් පිරවූ ගෝනි 25 ක් එම භාණ්ඩ තොගයට අයත්ව ඇත.
  
බිහිසුණු ක‍්‍රියා පිළිබඳ ශ‍්‍රී ලංකාවේ දී ගත් ඡායාරූප ද සහිතව මුද්‍රණය කර තිබූ විදෙස් රටක මුද්‍රණයක් යැයි සැකකෙරෙන ග‍්‍රන්ථයක් ද එහිදී පොලිස් බාරයට ගෙන තිබූ අතර භික්‍ෂූන් වහන්සේ විසින් භාවිත කරන කහ පැහැති කුඩ 3 ක ද ඊට ඇතුළත්ය.
                        
සෝදිසි මෙහෙයුමේදී සොයාගත් සැකකටයුතු භාණ්ඩ හා නිවෙස්වල සිට අත්අඩංගුවට ගෙන තිබූ සැකකරුවන් ඉදිරි ක‍්‍රියාමාර්ග සඳහා පන්නල පොලිසියට යොමු කළේය.