(අමදෝරු අමරජීව)
 
නැගෙනහිර පළාත් සභාව යනු, සිංහල, දෙමළ,  මුස්ලිම්  ජන වර්ග තුනම  සිටින සංකීර්ණ පළාතක් බැවින් එහි වැඩ කිරීමේදි සාධාරණත්වය හා මධ්‍යස්ථභාවය අතිශය වැදගත් බව නැගෙනහිර නව ආණ්ඩුකාර ෂාන් විජයලාල් ද සිල්වා මහතා අද (10) සිය ධුරයේ වැඩ භාර ගනිමින් පැවසීය.

ත්‍රිකුණාමලයේ පිහිටි නැගෙනහිර ආණ්ඩුකාර ලේකම් කාර්යාලයේදී සර්ව ආගමික වතාවත්වල නිරතවීමෙන් අනතුරුව ඒ මහතා සිය ධූරයේ වැඩභාර ගත්තේය.

මෙහිදී තවදුරටත් අදහස් දැක්වු  ආණ්ඩුකාර  ෂාන් විජයලාල්  සිල්වා මහතා මෙසේ කීය.

“මගේ දේශපාලන මතය කුමක් වුවත් ආණ්ඩුකාරවරයෙකු වූ පසු අර ගේට්ටුවෙන්  ඇතුළට  එනකොට දේශපාලන මතය නැමැති සලු පිලි ගලවලා ඇතුල් වෙන්න ඕන. එහෙම වුණාම තමයි  මේ පළාතේ ජනතාවට සේවය කරන්න ලෙහෙසිවන්නේ. පසුගිය දිනවල රට විවිධ හැලහැප්පීම්වලට ලක්වුණා. ඒ තත්වය තුළ  හැමෝම බැලුවේ  නැගෙනහිර පළාත දෙසයි. ඒ නිසා මේ පළාතේ වැඩ කිරීමේදි සුපරීක්ෂාකාරී වියයුතුයි. පුර්වගාමී  ආණ්ඩුකාරවරු නතර කළ තැනින් වැඩ පටන් ගන්න මම බලාපොරොත්තු වෙනවා.
 
ආණ්ඩුකාරවරු  සමඟ වැඩ කිරීමේදි ජනතා නියෝජිතයින්ගේ මතය අර්ථ නිරුපණය වෙන්නේ නැහැ. ඒ දේ මම කියන්නේ පෞද්ගලික කාරණයක් විදිහටයි. පවතින නීති වෙනස් කරන්න මට බැහැ. ඒ නිසා මේ ප්‍රශ්නයට හොඳම  විසඳුම පළාත් සභාමැතිවරණය කඩිනමින් පැවැත්වීමයි. මොන හේතුව නිසාද දන්නේ නැහැ පළාත් සභා මැතිවරණය කල් යනවා. දැනට ලංකාවේ ඇති පළාත් සභා නවයෙන් අටක් විසුරුවලා. සමහරු  පළාත් සභා ක්‍රමය විවේචනය කළත් එහි යම් මට්ටමක හොඳ දේ අරගෙන නැගෙනහිර කටයුතු කරගෙන යන්න මම බලාපොරොත්තු වෙනවා. නැගෙනහිර පළාත කියන්නේ බහු වාර්ගික, බහු ආගමික පළාතක්”  යැයිද පැවසීය.

මෙම අවස්ථාවට එක්වූ පළාත් ප්‍රධාන ලේකම්  ඩී.එම්.සරත් අභයගුණවර්ධන,ආණ්ඩුකාර  ලේකම් අසංක අභයගුණවර්ධන, පළාත් සභාවේ සභාපති චන්ද්‍රදාස ගලප්පත්ති, හිටපු ඇමතිනි ආරියවති ගලප්පත්ති යන මහත්ම මහත්මීහුද මෙහිදී අදහස් දැක්වූහ.