(රංජිත් රාජපක්ෂ)                        

නුවරඑළිය මූලික රෝහල අවස්ථා කිහිපයකදීම සෞඛ්‍යය සහ පෝෂණ අමාත්‍යය රාජිත සේනාරත්න මහතා විසින් විවෘත කළ බව පවසමින් රජයේ වෛද්‍ය නිලධාරීන්ගේ සංගමයේ වෛද්‍යවරුගේ පිරිසක් ඊට විරෝධය දක්වමින් කළු පටි පැළඳ අද (15) රාජකාරී කටයුතුවල නිරතවූහ.
 
රජයේ වෛද්‍ය නිලධාරීන් සංගමයේ නුවරඑළිය ශාඛාවේ කමිටු සමාජික චමත් ලියනගේ මහතා ඇතුළු සාමාජිකවරු පිරිසක් අද(15) රෝහල විවෘත කිරීමේ උත්සවයට සහභාගී නොවී, කළු පටි පැළඳ මාධ්‍ය සාකච්ඡාවක් පැවැත්වූහ.
 
මෙම මාධ්‍යය සාකච්ඡාවේදි අදහස් දැක් වූ රජයේ වෛද්‍යය නිලධාරින්ගේ සංගමයේ කමිටු සාමාජික චමත් ගියනගේ මහතා මෙසේ පැවසීය.
 
“මෙම උත්සවයට සහභාගී නොවුණේ හේතු කිහිපයක් නිසා. එකක් තමයි රෝහල සහ නේවාසික සංකීර්ණවල මීට කලින් රාජිත අමාත්‍යවරයා විසින් නේවාසික සංකිර්ණ දෙකක් විවෘත කරලා තියෙනවා. ඊට අමතරව මේ අවුරුද්දදේ අප්‍රේල් මාසය වනවිට පාලන අධිකාරිය විසින් මේ  රෝහල නැවත වතාවක් විවෘත කළා. අද අයෙත් මේ රෝහල විවෘත කරනවා. මේ විනාශ කරන්නේ ජනතාවගේ විශාල බදු මුදලක්. 
 
අනිත් එක තමයි අද දිනයේදි මෙම උත්සව කටයුත්ත සඳහා මෙපමණ කාලයක් නව රෝහලේ පැවතුණු වෛද්‍ය වාට්ටු, මුලික ප්‍රතිකාර ඒක්ක, හදිසි ප්‍රතිකාර ඒකකය, සායන, පැරණි රෝහලේයි පැවැත්වුණේ. අද දිනයේ ඇතුළත් වන රෝගීන් නැවත වතාවක් තාවකාලිකව නතර කරගෙන තිබෙනවා. පැරණි රෝහලේ හදිසි ප්‍රතිකාර ඒකකයත් අද දිනයේදි  පැරණි රෝහලට රැගෙන ගිහින් තියෙනවා. මේ අතරතුරදි හදිසි අනතුරක් සිදුවෙලා විශාල පිරිසක් රැගෙන ආවොත් මොකද වෙන්නේ,  කාර්යය මණ්ඩලය දෙකට බෙදෙන්න ඕනි. කාර්යය මණ්ඩලය ඉතා අඩු ප්‍රමාණයකින් තමයි නුවරඑළිය රෝහල පවත්වගෙන යන්නේ. කාර්යය මණ්ඩලය දෙකට බෙදිලා වැඩ කරන්න ගියා රෝගී ජනතාවගේ ජීවිත අවදානමේ. ‍ මේ වේලාවේ රෝගීන් මෙන්ම අධ්‍යක්ෂකතුමා ඇතුළු වෛද්‍යවරුන්, හෙද නිලධාරින් සියල්ලන්ම අපහසුතාවයට පත් වෙනවා.
 
මේකේ වගකීම කවුද භාරගන්නේ රාජිත සේනාරත්න සෞඛ්‍යය ඇමතිවරයාද සෞඛ්‍ය අමාත්‍යංශයද?

එනිසා අපි මේකට විරෝධය දැක්වීමක් ලෙස  අධ්‍යක්ෂකවරයාව දැනුවත් කළා. මේ උත්සවය පවත්වන එක අපිට ප්‍රශ්නයක් නැහැ, හැබැයි උත්සව පවත්වනවා කියලා රෝහලේ හදිසි ප්‍රතිකාර ඒකකය වගේ දේවල් එහෙට මෙහෙට රැගෙනයාම වාගේ දේවල් කරන්ඩ එපා, කියලා. ලිඛිතවත් අපි දැනුම් දුන්නා මේකට විරුද්ධ බව, එනිසා අපි කළු පටි පැළදගෙන සාමාන්‍ය පරිදි රාජකාරිවල නිරත වෙනවා.
මොනම හේතුවක් නිසාවත් රජයේ වෛද්‍ය නිලධාරීන්ගේ සංගමයේ කිසිම සාමාජිකයෙකු අද දිනයේ පැවති මෙම උත්සවයට සහභාගී වුණේ නැහැ” යැයිද හෙතෙම පැවසීය.