(ප්‍රසන්න පත්මසිරි)

බිබිල ගලඔය ජාතික වන උද්‍යානයට අයත් නිල්ගල ඹෟෂධීය වනයේ බෝවැල්ල ප්‍රදේශයේ මියගොස් සිටි දිවියන් දෙදෙනෙකුගේ මළ සිරුරු අද (31) සොයාගත් බව පොලීසිය කියයි.

වනයේ මියගොස් සිටි ශ්‍රී ලංකාවට ආවේණික (Panthera Pardus kotiya) නමින් හඳුන්වන දිවියන් දෙදෙනාගේ වයස අවුරුදු 2ක් පමණ වෙන බව වන ජීවි නිලධාරීහු කියති.

දිවියන් දෙදෙනා  මියගොස් සිටි ස්ථානයේ වස මිශ්‍ර බවට සැකකරන ගව පැටියෙකුගේ මළ සිරුරක් තිබී වන ජීවී නිලධාරීන් සොයාගෙන තිබේ. ඌව මධ්‍යම වනජීවී කළාප භාර වනජීවි පශූ වෛද්‍ය නිලධාරී ඩබ්ලිව්.එම් ධර්මකීර්ති මහතා එම ස්ථානයට පැමිණ සිදු කළ පරීක්ෂණයකින් පසු වස මිශ්‍රවී සතුන් මියයන්නට ඇති බවට සැකකරන බව ඔහු පැවසීය.

ප්‍රදේශයේ ගවයින් ඇතුළු සතුන් ආහාරයට ගනිමින් මෙම දිවියන් දෙදෙනා කාලයක සිට වනයේ සැරිසැරු බව ප්‍රදේශවාසීහු කියති. මියගිය දිවියන් දෙදෙනාගේ මළ සිරුරු උඩවලව ඇත් අතුරුසෙවනේ ඇති සත්ත්ව රෝහලට ගෙන ගොස් පරීක්ෂණ කරන බව වන ජීවි නිලධාරීහු පවසති.