(ඩී.ජී.සුගතපාල)
 
බහුදින යාත්‍රාවකින් නීතිවිරෝධී ලෙස ඕස්ට්‍රේලියාව බලා යමින් සිටියදී  අත්අඩංගුවට ගෙන අධිකරණයට ඉදිරිපත් කිරීමෙන් පසු බන්ධනාගාර ගතකර සිටි සැකකරුවන් 29දෙනාගෙන් 27දෙනෙකු එක් අයෙකු රුපියල් ලක්ෂ පහ බැගින් වූ ශරීර ඇපයක් මත මුදාහැරීමටත් දෙදෙනකු තවදුරටත් ජූනි 4 දක්වා බන්ධනාගාර ගතකිරීමටත් ගාල්ල ප්‍රධාන මහේස්ත්‍රාත් හර්ෂණ කැකුණවෙල මහතා අද (20)නියෝග කළේය.
 
මෙසේ තවදුරටත් බන්ධනාගාර ගතකරනු ලැබුවේ යාත්‍රාවේ හිමිකරු වන කුරුකුලසූරිය එමානුවෙල් අමිල යසින් ප්‍රනාන්දු සහ ෂෙල්ටන් අජිත් ගිහාන් කෘස් යන දෙදෙනා වෙති.
 
හලාවත, කුරුණෑගල, යාපනය, වව්නියාව සහ මඩකලපුව ප්‍රදේශවල පදිංචිකරුවන් 41දෙනෙකු මැයි  5 හලාවත මුහුදු වෙරළින් බහුදින යාත්‍රාවක නැගී ඕස්ට්‍රේලියාව බලා පිටත්ව ඇත.
 
එසේයමින් සිටියදී ඔවුන්ගේ යාත්‍රාව අනතුරට ලක්ව තිබියදී  වෙනත් නෞකාවක් මගින් ඒ බව නාවික හමුදා මූලස්ථානය වෙත දැනුම් දී තිබේ. ඒ අනුව මැයි 21  නාවික හමුදා මූලස්ථානය මගින් මුහුදේ මුර සංචාරක කටයුතු සඳහා ගොස් සිටි නන්දිමිත්‍ර නෞකාවට පණිවුඩයක් ලබාදී තිබේ.
 
නන්දිමිත්‍ර නෞකාව එම ස්ථානයට ගොස් අනතුරට පත්වූ යාත්‍රාවේ සිටි පිරිස බේරගෙන නැවට නංවාගෙන ඇත. දින කිහිපයකින් ආහාර පාන නොලැබුණු එම පිරිසට නාවික හමුදා නිලධාරීන් ප්‍රථමාධාර සහ ආහාරපාන ලබාදී මැයි 25දින ගාල්ල දක්ෂිණ නාවික කඳවුර වෙත ගෙනැවිත් වැඩිදුර පරීක්ෂණ සඳහා වරාය පොලිසියට බාරදී ඇත.
 
වරාය පොලිසිය මගින් එම 41දෙනා අධිකරණයට ඉදිරිපත් කළ අවස්ථාවේ බාල වයස්කාර ළමයින් අටදෙනා නඩුවෙන් මුදාහැරීමටත් කාන්තාවන් හතරදෙනා එක්අයෙකු රුපියල් ලක්ෂය බැගින්වූ ශරීර ඇපයක් මත මුදාහැරීමටත් නියෝග කළ මහෙස්ත්‍රාත්වරයා  පිරිමි 29දෙනා බන්ධනාගාර ගත කිරීමටත් නියෝග කළේය. 
 
වරාය පොලිසියේ උප පොලිස් පරීක්ෂක උදය කුමාර මහතා විසින් පැමිණිල්ල මෙහෙයවන ලදී.