(හිරාන් ප්‍රියංකර ජයසිංහ)

තහනම් දැල් ආම්පන්න යොදා ගනිමින් මසුන් මරමින් සිටි ධීවරයින් 24 දෙනෙකු අද (20) වැලිගම මුහුදු තීරයේදී  වෙරළ ආරක්ෂක දෙපාර්තමේන්තුවේ නිලධාරීන් විසින් අත්අඩංගුවට ගෙන ඇති බව ධීවර හා ජලජ සම්පත් දෙපාර්තමේන්තුව පවසයි.

මෙසේ අත්අඩංගුවට පත්ව ඇත්තේ වැලිගම හා මිරිස්ස යන ප්‍රදේශවල පදිංචි ධීවරයින් බව කියයි. අදාල ධීවරයින් එන්ජීන් සවිකළ විශාල ඔරු මගින් තහනම් දැල් යොදා ගනිමින් මසුන් මරමින් සිටියදී වෙරළ ආරක්ෂක නිලධාරීන් විසින් මෙසේ අත්අඩංගුවට ගෙන තිබේ.

අත්අඩංගුවට පත්වූ ධීවරයින් සමඟ තහනම් දැල් ආම්පන්න තුනක් හා විශාල ඔරු තුනක් ද අත් අඩංගුවට ගෙන තිබේ.

අත්අඩංගුවට ගත් ධීවරයින් 24 දෙනා මාතර සහකාර ධීවර අධ්‍යක්ෂ කාර්යාලයට භාර දීමට කටයුතු කර ඇති අතර කොළඹ ධීවර දෙපාර්තමේන්තුවේ විමර්ශන අංශය මගින් මේ පිළිබඳව පරීක්ෂණයක් ආරම්භ කර ඇති අතර ඒ සඳහා සහකාර අධ්‍යක්ෂ එන්.ඩබ්ලියු .ඩි.එස්  .යු. පරණවිතාරන , ධීවර පරීක්ෂක එස්.සමරනායක යන නිලධාරීන් මෙම වැටලීම සිදුකර ඇත.