(ඡායාරූප හා සටහන -මස්කෙළිය ගාමිණී බණ්ඩාර ඉලංගන්තිලක)
කඳපොළ පොලිස් වසමට අයත්, නුවරඑළිය-උඩුපුස්සල්ලාව ප්‍රධාන මාර්ගයේ, කඳපොළ එස්කඩේල් ප්‍රදේශයේදී අද (17) ත්‍රීවීල් රථයක්  අඩි 100 ක් පමණ ප්‍රපාතයට පෙරළීමෙන් එහි ගමන් කරමින් සිටි එකම පවුලේ මව හා  පියා මිය ගොස් දරුවන් තිදෙනෙක් බරපතල තුවාල ලබා නුවරඑළිය මහ රෝහල වෙත ඇතුළත් කරනු ලැබූහ.

මෙසේ මිය ගොස් ඇත්තේ,  වලපනේ, මන්දාරම් නුවර, එළමුල්ල ප්‍රදේශයේ පදිංචිව සිටි සැමියා හා බිරිඳ වන ටී.පී රූපසිංහ (50) හා රෝහිණී  කුමාරි (45) යන දෙදෙනාය. තුවාල ලබා සිටින දරුවන් අවුරුදු 06, 16 හා 19 වයස්වල පසුවන ගැහැණු ළමයෙක් හා පිරිමි ළමයින් දෙදෙනෙකි.

ත්‍රිරෝද රථයේ වේගය පාලනය කිරීමට නොහැකිව මෙම අනතුර සිදුව ඇති බව වැඩිදුර පරීක්ෂණ පවත්වන කඳපොළ පොලීසිය පවසයි.

මිය ගිය අයගේ මළසිරුරු නුවරඑළිය මහ රෝහලේ තැන්පත් කර ඇත.