(රොහාන් කුමාර දිසානායක)
 
මාවනැල්ල නගරයේ ඩෙංගු මදුරුවන් බෝවන ස්ථාන පවත්වාගෙන ගිය පුද්ගලයන් 44දෙනෙකුගෙන් 43දෙනෙකුට, එක් අයකුට රුපියල් 6,000 බැගින්  රුපියල් 258,000ක දඩයක් ගෙවන ලෙසද, අනෙක් පුද්ගලයාට  රුපියල් 10,000ක දඩයක් ගෙවන ලෙසද මාවනැල්ල මහේස්ත්‍රාත් උපුල් රාජකරුණා මහතා අද(24) නියෝග කළේය.
 
අධිකරණය මග ඇර සිටි පස්දෙනෙකු අත්අඩංගුවට ගෙන අධිකරණයට ඉදිරිපත් කරණ ලෙසද ඒ මහතා නියම කළේය.
 
මෙලෙස දඬුවම් ලැබුවේ මාවනැල්ල නගරයේ වෙළඳසැල් හා නිවාසවල පදිංචිව සිටින පුද්ගලයන් 49දෙනෙකි.
 
කාලයක සිට ජලය එක්රැස් වන වැහි පීලි, කොන්ක්‍රිට් තට්ටු, බැරල් හා අබලි යකඩ එකතු කරන ස්ථාන පරීක්ෂා කළ මාවනැල්ල මහජන සෞඛ්‍ය පරීක්ෂක නිලධාරීහු එම ස්ථානවල මදුරුවන් බෝවන බැවින් ඔවුන්ට විරුද්ධව මාවනැල්ල මහේස්ත්‍රාත් අධිකරණයේ නඩු 49ක් පැවරූහ.
 
එම නඩු අද (24) දහවල් කැඳවනු ලැබූ අවස්ථාවේ දී සැකකරුවන් පස් දෙනෙකු අධිකරණයේ පෙනී නොසිටි අතර ඔවුන් පස්දෙනාට විනිසුරු වරයා වරෙන්තු නිකුත් කළේය.
 
අබලි යකඩ එකතු කරන අනාරක්ෂිත ස්ථානයක් පවත්වා ගෙනගිය එක් පුද්ගලයකුට රුපියල් 10,000ක දඩයක් ගෙවන ලෙසද එම ස්ථානයේ වහලයක් ඉදිකරන ලෙසද නියෝග කළේය.
 
සැකකරුවන් වෙනුවෙන් නීතිඥ මහත්ම මහත්මීන් පිරිසක් ඉදිරිපත් වූ අතර මාවනැල්ල මහජන සෞඛ්‍ය පරීක්ෂක ශ්‍රීයන්ත බංඩාර මහතා පැමිණිල්ල මෙහෙයවීය.