( කේ බුද්ධික කුමාරසිරි )

හෝමාගම හබරකඩ ප‍්‍රදේශයේ උත්සව ශාලාවක විවාහ මංගල උත්සවයක් පැවැත්වෙන අතරතුර එම මංගල උත්සවය ඡායාරූප ගත කළ ඡායාරූප ශිල්පියාගේ රුපියල් ලක්ෂ හතරක් පමණ වන කැමරා උපකරණ කිහිපයක් තිබූ බෑගයක් සොරා ගෙන පලා ගිය ව්‍යාපාර කළමණාකරණය පිළිබදව උපාධිධාරී ති‍්‍ර රෝද රථ රියදුරෙකු වන පුද්ගලයෙකු  අද (26)  දින සැකපිට අත් අඩංගුවට ගත් බව අතුරුගිරිය පොලිසිය පවසයි

සොරා ගත් කැමරාව තුළ අදාල මංගල උත්සවයෙහි ඡායාරූප ගත කළ මතක ගබඩාවන්(මෙමරි කාඩ්පත) ඇතුළත්ව තිබූ බැවින් මනාල යුවළ  ඔවුන්ගේ ඡායාරූප ඉල්ලි සිටීමෙන්  ඡායාරූප ශිල්පියා දැඩි අපහසුතාවට පත්ව මෙම සොරකම පිළිබඳව පොලීසියට දැන්ම් දී තිබේ.

ඒ අනුව කි‍්‍රයාත්මක වූ අතුරුගිරිය පොලිසියේ නිළදාරීන් අදාල උත්සව ශාලාවෙහි ආරක්ෂිත කැමරා දර්ශන සහ වෙනත් ජංගම දුරකථන මගින් ලබා ගත් විඩියෝ දර්ශන පරීක්ෂා කරමින් සැකකරු හඳුනා ගැනීමට කටයුතු කරමින් සිටින අතරතුර කැමරා බෑගය සොරා ගත් පුද්ගලයා විසින් හිමිකරුට ඇමැතුම්  ලබා  දි පවසා ඇත්තේ එම ආම්පන්න ලබා දීමට නම් රුපියල්  ලක්ෂ දෙකක කප්පමක් ලබා දෙන ලෙසයි.
 
එම තොරතුරු අනුව දුරකතන වාර්තා කැඳවා දත්ත අනුව  පොලීසිය එම සැකකරු අත්අඩංගුවට ගෙන තිබේ.

සැකකරුගේ නිවසේ තිබී සොරකම් කල කැමරා උපකරණ කට්ටලය ඇතුලත් බෑගය ද සොයා ගැනීමට හැකි වූ බවත් එහි අදාල මංගල උත්සවයෙහි ඡායාරූප ඇතුළත් මෙමරි කාර්ඞ් එක ද තිබී සොයා ගැනීමට හැකි වූ බවද පොලිසිය පවසයි. සැකකරු  අධිකරණයට ඉදිරිපත් කිරීමට නියමිතය.