(උපාලි ආනන්ද)

උතුරු මැද පළාත් ප්‍රධාන ලේකම්වරයා විසින් පත් කළ ත්‍රිපුද්ගල කමිටු නිර්දේශයක් මත පළාත් ප්‍රධාන අමාත්‍යංශයේ ලේකම්වරයා  විසින් දූෂණ චෝදනාවකට වැඩ තහනමට ලක් කරනු ලැබ සිටි උතුරු මැද පළාත් මාර්ග සංවර්ධන අධිකාරියේ නිලධාරියෙකු යළි සේවයේ පිහිටුවීම නීතියට පටහැනි බව රජයේ විගණකාධිපති දෙපාර්තමේන්තුව කළ විගණන විමසුමකදී අනාවරණය වී ඇති බව  අනුරාධපුර විගණන අධිකාරිවරයා  විසින් උතුරු මැද පළාත් මාර්ග සංවර්ධන අධිකරියේ සභාපතිවරයාට දැනුම් දී තිබේ.

මෙලෙස නීතියට පටහැනිව යළි සේවයේ පිහිටුවා ඇත්තේ අනුරාධපුර අරිප්පු මාර්ගය සහ මැදවච්චිය ඇටඹගස්කඩ මාර්ගය  කාපට් අතුරා අලුත් වැඩියා කිරීමේදී රුපියල් කෝටි ගණනක මූල්‍ය අක්‍රමිකතාවක්  සිදු කිරීමේ චෝදනාවනට වැඩ තහනමට ලක්ව සිටි උතුරු මැද පළාත්  මාර්ග සංවර්ධන අධිකාරියේ නිලධාරියෙකි.

පළාත් මාර්ග සංවර්ධන අධිකාරියේ සභාපතිවරයාට යොමු කර ඇති අදාල විගණන විමසුම් වාර්තාවේ තවදුරටත් මෙසේ සඳහන්ය. තමා යළි සේවයේ පිහිටුවන  ලෙස ඉල්ලමින් උතුරු මැද පළාත් මාර්ග සංවර්ධන අධිකාරියේ වැඩ තහනමට ලක්ව සිටි නිලධාරියා විසින් ඉදිරිපත් කරන ලද අභියාචනය සලකා බැලීමට පළාත් ප්‍රධාන ලේකම්වරයා විසින් ත්‍රිපුද්ගල කමිටුවක් පත් කර තිබේ.

එම කමිටුව ලබා දුන් නිර්දේශය ප්‍රධාන ලේකම්වරයාට දැනුම් දුන් පසුව  පළාත් ප්‍රධාන  අමාත්‍යංශයේ ලේකම්වරිය විසින් අදාළ නිලධාරියා යළි සේවයේ පිහිටවනු ලැබ ඇත. එසේ වුවත් මෙම ක්‍රියා පටිපාටිය සම්බන්ධයෙන් විවිධ විවේචන එල්ලවෙමින් තිබේ.

මෙම විගණන විමසුමේ පිටපත් පළාත් ආණ්ඩුකාරවරයාට සහ පළාත් ප්‍රධාන ලේකම්වරයාට ද යොමු කර ඇත.