(ජී.ඩබ්ලිව්.කේ.ප්‍රේමතිලක ද සිල්වා)

බිම් මට්ටමේ සෞඛ්‍ය ආයතන වැඩිදියුණු කිරීමේ ව්‍යාපෘතිය යටතේ ගාල්ල දිස්ත්‍රික්කයේ ප්‍රාදේශීය රෝහල් 5 ක බාහිර රෝගී සේවා සම්පුර්ණයෙන්ම පරිගණක ගත  කිරීමට  කටයුතු යොදා ඇතැයි ගාල්ල දිස්ත්‍රික් සෞඛ්‍ය සේවා අධ්‍යක්ෂ විශේෂඥ වෛද්‍ය චන්දිම සිරිතුංග මහතා පවසයි.

ඒ අනුව මෙම ව්‍යාපෘතිය සඳහා අහංගම, බද්දෙගම, බටපොල, කරන්දෙනිය සහ අම්බලන්ගොඩ යන ප්‍රාදේශීය රෝහල් තෝරාගෙන ඇත. ඒ අනුව මෙම රෝහල්වල බාහිර රෝගී අංශයෙන් ප්‍රතිකාර ගැනීම සඳහා පැමිණෙන රෝගින් සඳහා ඩිජිටල් කාඩ්පතක් නිකුත් කරයි.

එම රෝගින්ට අවශ්‍ය ඖෂධ වෛද්‍යවරයා විසින් සටහන් කරණු ලබන්නේ පරිගණකයට දත්ත කැවීමෙනි. එම තොරතුරු රෝගියාගේ ඩිජිටල් කාඩ් පතෙහි සටහන්වේ. එසැනින් මෙම තොරතුරු රෝහලේ ඖෂධ නිකුත්කරණ ස්ථානයට සහ වෛද්‍ය රසායනාගාරයට සම්ප්‍රේෂණය වේ. ඒ අනුව ඖෂධ නිකුත් කිරීමට සහ රසායනාගාර පරික්ෂා සඳහා පෝරම පිරවීම අවශ්‍ය නොවේ.

පසුව රෝගියා වෛද්‍ය ප්‍රතිකාර සඳහා රෝහලට පැමිණෙන විට මෙම කාඩ්පත රැගෙන ආ යුතු අතර එය පරිඝණකයට ඇතුළත් කිරීම තුළින් එම රෝගියාගේ රෝග ඉතිහාසය, කලින් නිකුත් කරන ලද ඖෂධ සිදුකළ රසායනාගාර පරික්ෂණ තොරතුරු යනාදිය ක්ෂණිකව වෛද්‍යවරයා දැනුම්වත් වීම සිදුවේ.

මේ හේතුවෙන් අදාල රෝගියාට තවදුරටත් ප්‍රතිකාර කිරීම කාර්යක්ෂමව සිදුකිරීමට අදාල වෛද්‍යවරයාට හැකියාව ලැබේ.

මෙම වැඩපිළිවෙළ සඳහා අවශ්‍ය යටිතල පහසුකම් සැපයීම ගාල්ල දිස්ත්‍රික් සේවා අධ්‍යක්ෂ කාර්යාලය මගින්  මේ දිනවල සිදුකරන අතර 2019 වර්ෂයේදී මෙම වැඩ සටහන ස්ථාපිත කිරීමට සැලසුම් කර තිබේ.