(බිමල් ශ්‍යාමන් ජයසිංහ)
 
පානදුර එළුවිල ප්‍රදේශයේ මුස්ලිම් පාසලක ගුරුවරයකුට එම ප්‍රදේශයේ පුද්ගලයකු පහරදීමේ සිද්ධියට විරෝධය දක්වමින් අද(10) පාසල් ගුරුවරු, ආදි ශිෂ්‍ය සංගමය, මව්පියවරු සහ සිසුහු උද්ඝෝෂණයක නිරතවූහ.
 
පහර කෑ බව කියන ගුරුවරයා පානදුර මූලික රෝහලට ඇතුළත් වී ඇත.
 
ඊයේ(09) දහවල් පාසල නිම වී නිවස කරායමින් සිටි, එම විද්‍යාලයේ ආගම උගන්වන ගුරුවරයාට පහරදුන් පුද්ගලයා අත්අඩංගුවට ගන්නැයි  ඉල්ලා මෙම විරෝධතාව පැවැත්විණි.
 
මෙම උද්ඝෝෂණය පැයකට ආසන්න කාලයක් පැවැත්වුණු අතර මේ හේතුවෙන් පානදුර - කොළඹ මාර්ගයේ වාහන ධාවනයට බාධා එල්ල විය.
 
උද්ඝෝෂණයට පාසල් සිසුන් සහභාගී කරගැනීම වැරදි බවත්, එම ප්‍රශ්නයට විසඳුම් ලබාදෙන බවත්, පානදුර පොලිසියේ මූලස්ථාන ප්‍රධාන පොලිස් පරීක්ෂක තුෂාර ද සිල්වා මහතා විරෝධයේ යෙදුණු පිරිසට පෙන්වා දුන්නේය. ඒ සමඟ සිසුන් පාසල වෙත යොමු කර උද්ඝෝෂණය නැවතූ පිරිස විසිර ගියහ.