(බිමල් ශ්‍යාමන් ජයසිංහ සහ ශාන්ත ප්‍රදීප් කුලරත්න)
 
කහතුඩුව පොල්ගස්ඕවිට හෙරළියාවල ප්‍රදේශයේ හෝටලයක් අසළ ඇළ මාර්ගයට වැටී තිබූ සුඛෝපභෝගී මෝටර් රථයක තරුණයකුගේ මළ සිරුරක් තිබී අද(20) හමු වූ බව කහතුඩුව පොලිසිය කියයි.
 
මියගොස් ඇත්තේ දෙහිවල නැදිමාල පදිංචිව සිටි ලහිරු සමරසිංහ නම් 29 හැවිරිදි තරුණයෙකි.
 
ඉකුත් 17වැනි දින සවස හෝටලයක පැවැත්වෙන උපන්දින සාදයකට සහභාගී වන බව මෙම තරුණයා මවට පවසා තිබූ බවද, ඔහු නැවත නිවසට නොපැමිණි බව පවසමින් මව ඊයේ (19) කොහුවල පොලිසියට පැමිණිලි කර තිබූ බවද, එම පොලිස් නිලධාරීන් කහතුඩුව පොලිසියට එම සිදුවීම දන්වා තිබූ බවද පොලිස් නිලධාරියෙක් පැවසීය.
 
එදින සවස 5.30ට පමණ මෙම තරුණයා ඇතුළු තරුණ තරුණියන් 25දෙනෙකු පමණ එම හෝටලය වෙත සාදය සඳහා පැමිණ ඇති බව අමුත්තන්ගේ සටහන් තබන පොත පරීක්ෂා කිරීමේදී තහවුරු විණි යැයි පොලිසිය කීය.
 
හෝටලයේ සේවකයකු ගොඩවෙල ඇළ අතරින් ඇති මාර්ගයේ අද(20) උදෑසන ගමන්කරමින් තිබියදී මෝටර් රථය දැක හෝටල් හිමිකරුට දන්වා පසුව කහතුඩුව පොලිසියට දන්වා ඇතැයිද, ඒ අනුව මෙම තරුණයාගේ මළ සිරුර හමුව ඇතැයි ද පොලිසිය කියයි.
 
කහතුඩුව පොලිසිය සිද්ධිය සම්බන්ධයෙන් පරීක්ෂණ පවත්වයි.