(පැතුම් දර්ශන)
 කහටගස්දිගිලිය ප්‍රාදේශීය ලේකම් සුදර්ශන දිසානායක මහතා ප්‍රදේශයේ ඉඩම් සම්බන්ධයෙන් පක්ෂග්‍රාහීව තීරණ ගන්නා බව පවසා ඔහු වෙනත් ප්‍රදේශයකට මාරු කර යවන ලෙස බලකරමින් පිරිසක් ඊයේ (03) දහවල්   සිට  කහටගස්දිගිලිය ප්‍රාදේශීය ලේකම් කාර්යාලය ඉදිරිපිට පැවැත්වු උද්ඝෝෂණයට විරෝධය දක්වමින් කහටගස්දිගිලිය ප්‍රාදේශීය ලේකම් කොට්ඨාසයේම  තවත් පිරිසක් අද  (04)  උදඝෝෂණයට එක්ව සිටිති.
 
කහටගස්දිගිලිය ප්‍රාදේශීය ලේකම්වරයා නීතිගරුක නිලධාරියෙකු බවත් ඔහු කිසිවිටෙක පක්ෂග්‍රාහීව කටයුතු නොකරන බවත් එහිදී උද්ඝෝෂකයෝ පැවසූහ.
 
 තම පටු අරමුණු ඉටුකර ගැනීම සඳහා අවස්ථාව නොලැබුණ කල්හි බොරු චෝදනා ඉදිරිපත් කර ප්‍රාදේශීය ලේකම්වරයා සහ නිලධාරීන් අපහසුතාවයට පත්කිරීමට සීමිත පිරිසක් උත්සාහ කරන බවත් ඒ සඳහා කහටගස්දිගිලිය ප්‍රදේශයේ ජනතාව දැඩි විරෝධයක් දක්වන බවත් ඔවුහු වැඩිදුරටත් පැවසූහ.
 
කහටගස්දිගිලිය ප්‍රාදේශීය ලේකම් කාර්යාලය අසලින් ආරම්භ කළ උද්ඝෝෂණය පාගමනින් කහටගස්දිගිලිය නගරය දක්වා ගොස් ඔරලෝසුව කණුව අසලින් ආපසු හැරී අනුරාධපුර ත්‍රීකුණාමලය මාර්ගයේ පිහිටි කහටගස්දිගිලිය ප්‍රාදේශීය ලේකම් කාර්යාලය අසලට පැමිණ නැවත උද්ඝෝෂණයේ නිරතවූහ.
 
ඒ වනවිටත් ප්‍රාදේශීය ලේකම්වරයාට එල්ල වී ඇති චෝදනා සම්බන්ධයෙන් විමර්ශනය කිරීම සඳහා රාජ්‍ය පරිපාලන අමාත්‍යංශයේ නිලධාරීන් පිරිසක් කහටගස්දිගිලිය ප්‍රාදේශීය ලේකම් කාර්යාලයට පැමිණ සිටි අතර උද්ඝෝෂකයෝ එම නිලධාරීන්ටද කරුණු පහදා දෙමින් ලිඛිතව තම ඉල්ලීම් ඉදිරිපත් කළහ.

පැයක පමණ කාලයක් ඔවුන් උද්ඝෝෂණයේ නිරත වීමෙන් පසුෙ විසිර ගිය අතර කහටගස්දිගිලිය පොලීසිය විසින් නගරයට සහ ප්‍රාදේශීය ලේකම් කාර්යාලය ඉදිරිපිටට දැඩි ආරක්ෂාවක් යොදා තිබුණි.