(රංජිත් රාජපක්‍ෂ)     

හැටන් නගරයේ මාස තුනක පමණ කාලයක සිට කැළි කසල බැහැර නොකිරිමට විරෝධය පළකරමින් හැටන් නගරයේ වෙළදසල් වසා අද (15) හර්තාල් ව්‍යපාරයක් පැවැත්විණි.මීට අමතරව ව්‍යපාරිකයන් පිරිසක් හා ප‍්‍රදේශවාසින් පිරිසක් උද්ඝෝෂණයක් ද පැවැත්වූහ.

උද්ඝෝෂකයන් හමුවීමට ලංකා කම්කරු කොංග‍්‍රසයේ නුවරඑළිය දිස්ති‍්‍රක් පාර්ලිමේන්තු මන්ති‍්‍ර අරුමුගම් තොන්ඩමන් මහතා පැමිණියේය.

කැළි කසළ අද දිනය ඇතුළත නුවරඑළිය ප‍්‍රාදේශීය සභාව මගින් දිඹුල කැළි කසළ ප්‍රතිචක්‍රීකරණ මධ්‍යස්ථානය වෙත බැහැර කරන ලෙස මන්ත්‍රීවරයා දික්ඔය නගර සභා ලේකම්වරියට උපදෙස් ලබා දීමත් සමග හර්තාල් ව්‍යපාරය හා උද්ඝෝෂණය කෙරිණි.

හැටන් දික්ඔය නගර සභාවට කැළි කසල බැහැර කිරිමට අක්කර පහක ඉඩමක් ලබා දෙන බවටද තොන්ඩමන් මහතා පොරොන්දු වූවේය.

වසර ගණනාවක් තිස්සේ එකතුවන කැළි කසල අක්‍රමවත් ලෙස කුඩාඔය ප‍්‍රදේශයට බැහැර කළ අතර තවදුරටත් කසළ බැහැර නොකරන ලෙසට දුන් අධිකරණ නියෝගයකින් පසුව එම ප්‍රදේශයට කසළ බැහැර කිරීම නැවතුණි.පසුව හැටන් දික්ඔය නගර සභාවේ එකතුවන කැළි කසල හැටන් මහජන වෙළදපොළ තුළ,රථගාල්වල සහ ප‍්‍රධාන මාර්ගවල ගොඩගසා තිබිම හේතුවෙන් පරිසර ගැටලූ රැසක් මතු විය.