(ශාන්ත චන්ද්‍රසිරි)

තලවකැලේ නගරයේ වෙළෙඳ සැලක කසළ තේ කුඩු හොඳ තේ කුඩු සමඟ කවලම් කර අළෙවි කිරීමට තබා තිබූ තේ කොළ කිලෝ 200 ක් සමඟ සැකකරුවන් දෙදෙනෙකු අද (04) රාත්‍රී 8.00 ට පමණ අත්අඩංගුවට ගත්බව තලවකැලේ පොලිස් විශේෂ කාර්ය බලකා කඳවුර පවසයි.

පිටස්තර ප්‍රදේශවල සිට කසළ තේ කුඩු රැගෙන විත් හොඳ තේ කුඩු සමඟ කවලම් කර ඒවා පැකට් කර අළෙවි කිරීමේ  ජාවාරමක මෙම පුද්ගලයන් කලක පටන්  නිරතව ඇති බව තලවකැලේ පොලිස් විශේෂකාර්ය බලකා කඳවුරේ අණදෙන නිලධාරී ආර්. එම්. රාජකරුණා මහතා කීය.

මෙම වෙළෙඳ සැලට තේ කුඩු අළෙවි කිරීමේ බලපත්‍රයක් ඇති බවත් එම බලපත්‍රය භාවිතා කරමින් මෙසේ කසළ තේ කුඩු හොඳ තේ කුඩුවල කවලම් කර අළෙවි කිරීම සිදු කර ඇති බවත් පොලිස් විශේෂ කාර්ය බලකායේ නිලධාරීන් සිදු කරන ලද පරීක්ෂණවලදී අනාවරණය වී තිබේ.

අත්අඩංගුවට ගන්නා ලද සැකකරුවන් දෙදෙනා හා කසළ තේ කුඩු තොගය නුවරඑළිය අධිකරණ වෙත ඉදිරිපත් කිරීම සඳහා තලවකැලේ පොලිසිය වෙත භාරදීමට පියවර ගත්බවද අණදෙන නිලධාරීවරයා වැඩිදුරටත් පැවැසීය.