(දයාරත්න ඇඹෝගම)
 
කුවේට් හි ගෘහ සේවිකාවක ලෙස සේවය කරමින් සිටියදී හාම්පුතාගේ පහර කෑමට ලක්ව බරපතල තුවාල ලබා ප්‍රතිකාර නොකිරීමෙන් මියගිය තම දියණියගේ මරණය පිළිබඳව විධිමත් පරීක්ෂණයක් සිදුකර සාධාරණයක් ඉටුකර දෙන්නැයි ඇයගේ පියා ඉල්ලා සිටියි.  

   
අනුරාධපුර මානින්කුලම  ඇත්පැටියාව පදිංචිව සිටි ඩබ්.එම් මදුමන්ති සෙනවිරත්න නැමති එක් දරු මවක් මෙසේ මිය ගොස් ඇත.

ඇයගේ පියා වන ඒ.සෙනවිරත්න යන අය සිද්ධිය පිළිබඳව අද (20) මෙසේ පැවසීය. 

මගේ දුවට ගෙහිමියන් නිතර නිතර පහර දෙන බව දුව අපට නිතර නිතර කතා කරලා කිව්වා. පස්සේ මම ඒජන්සියටත් විදේශ සේවා එකටත් මේ  බව දැනුම් දුන්නා. ඒ අය ඒ ගැන ගණන් ගත්තේවත් නැහැ මම බොරු කියනවා කියල කිව්වා.

පසුව මීට මාස දෙක හමාරකට පස්සේ දුව පහර කෑමෙන් මිය ගියා. සිරුර ලංකාවට ගෙනාවා.  දුවගේ මිනියත් එක්ක ඇයගේ ලේ තැවරණ අඳුමක් ද මිනිය සමඟ තිබී අපට හමු වුණා. 

එය ඉවත් කිරීමට ඔවුන්ට අමතක වෙලා. මම මේ පිළිබඳවත් විදේශ සේවා එකට දැනුම දුන්නා. එහෙත් තවමත් මේ සම්බන්ධයෙන් පරික්ෂණයක් සිදුකළේ නැහැ.

දුවගේ කරේ තිබුණු රත්රන් චෙන් එකයි,කරාබු ජෝඩුවයි නැහැ. ඇයට මාස දෙකහමාරක වැටුප් ගෙවලත් නැහැ.
මම දුවගේ ආදාහන කටයුතු වලින් පස්සෙත් කොළඹ ගිහින් මේ ගැන පරීක්ෂණයක් කරන්න කියල ඉල්ලුවා. එත් තාම මොකුත් කියන්නේ නැහැ. දුවට පහර දීලා බිම දාලා පෑගුවා. මට අමරුයි ඒත් බෙහෙත් දෙන්නෑ කියල දුව කෝල් කරලා කිව්වා. ඊට දවස් තුනකට පස්සේ දුව මැරිලා. දැන් දුවගේ දරුවත් අපිත් අසරණයි අපිට සළකන්න හිටියේ මගේ දුව විතරයි.

මම රජයෙන් ඉල්ලන්නේ  දුවගේ රන් බඩුයි ඇයගේ වැටුප් සල්ලි අපිට ලබාදීලා දුවට වුණ  අසාධාරණයට ඇයගේ දරුවා වෙනුවෙන් වන්දි මුදලක් ලබාදෙන ලෙස යනුවෙන් පැවසීය.