(අජිත්ලාල් ශාන්තඋදය)

නිසි රථවාහන සැලසුමක් ක‍්‍රියාත්මක නොවන කුරුවිට නගරයට ඔත්තේ ඉරට්ටේ වශයෙන් දින වෙන්කර වාහන නැවැත්වීමේ සැලසුමක් හඳුන්වාදෙන ලෙස  රත්නපුර  සහකාර පොලිස් අධිකාරී අයි.ජී.චන්ද්‍රෙස්න මහතා කුරුවිට පොලිසියට දැනුම් දුන්නේය. 

‘කුරුවිට සුන්දර නගරයක් කිරීමට එක් වෙමු‘ මැයෙන්  කුරුවිට වෙළඳ ව්‍යාපාරිකයින් සහ රථවාහන රියදුරන් නව රථ වාහන සැලැස්ම පිළිබඳව දැනුවත් කරමින්  ඒ පිළිබඳව ඔවුන්ගෙන් අදහස් ලබා ගැනීම සඳහා   පැවැති සම්මන්ත්‍රණයකදී පොලිස් අධිකාරීවරයා මේ බව  දැනුම් දුන්නේය.

 ඒ අනුව ලබන සතියේ සිට මෙම රථවාහන සැලැස්ම ක්‍රියාත්මක වීමට නියමිතය.

 එම සැලසුම ක්‍රියාත්මක වීමෙන් පසු  කොළඹ මඩකලපුව ප‍්‍රධාන මාර්ගයේ ධාවනය වන වාහන අවහිර වන ලෙස  මාර්ග සීමාවේ ඇති අනවසර ඉදිකිරීම් හා තාවකාලික වෙළඳසැල් ද මංමාවත් පනත උල්ලංඝණය වන ලෙස ස්ථාපිත කර ඇති ත‍්‍රිරෝද ගාල් ද ඉවත් කරන ලෙස කුරුවිට ප්‍රාදේශීය සභාවෙන් සුහද ඉල්ලීමක් කරන ලෙසත් දැනුම් දුන් පොලිස් අධිකාරීවරයා  ඔවුන් ඊට ප්‍රතිචාර නොදක්වන්නේ නම්  මංමාවත් පනතෙන් අධිකරණයට දන්වා  මේ බව ප්‍රාදේශිය සභා ලේකම්වරයාට එම බාධා ඉවත් කිරීමට අධිකරණ නියෝගයක් ගන්නැයිද පැවසීය.

එසේම නගරයේ දැඩි වාහන තදබදයකට හේතුවී ඇත්තේ   රත්නපුර දෙස සිට  පැමිණෙන  බස්  නැවතුම හෙයින් එය  ගෝනපිටිය හන්දිය දෙසට ගෙනයාමට ක‍්‍රියා කරන ලෙසද සහකාර පොලිස් අධිකාරීවරයා පොලීසියට උපදෙස් ලබා දුන්නේය.
 
 
කුරුවිට ප්‍රාදේශිය ලේකම් දිලිනි ධර්මදාස මහත්මිය, කුරුවිට පොලිස් ස්ථානාධිපති ප්‍රධාන පොලිස් පරීක්ෂක ඒ.ඒ.පී.ඒ. කුලතුංග මහතාද මෙහිදී අදහස් දැක්වුහ.
මාර්ග සංවර්ධන අධිකාරියේ විධායක ඉංජිනේරු ඩබ්.පී.ජේ.එල්.ජීවන් , පරිපාලන මහජන සෞඛ්‍ය පරීක්‍ෂක ජයවිලාල්  යන මහත්වරුද,  ලංකා විදුලිබල මණ්ඩලය නියෝජනය කරමින් විදුලි ඉංජිනේරුවරයෙක් , මහජන සෞඛ්‍ය පරීක්‍ෂකරු ඇතුළු පිරිසක් ඊට එක්ව සිටියහ.