(සිරංගිකා ලොකුකරවිට) 

මී උණ හෙවත් ලෙප්ටොස්පයිරෝසිස් රෝගයෙන් වැළකීම සඳහා ලබාගතයුතු ඖෂධ පානය කර කුඹුරෙහි වැඩ ආරම්භ කරන ලෙස වෛද්‍ය නලීන් විජේසේකර මහතා පැවසීය.අද (28) පැවැති ගාල්ල දිස්ත්‍රික් කෘෂිකර්ම කමිටුවේදී ඒ මහතා මේ බව සඳහන් කළේය.

මහ කන්නයේ කෘෂිකාර්මික කටයුතු මේ දිනවල ආරම්භ කරන බැවින් එම කාලය තුළ සතිපතා මෙම ඹෟෂධ ලබා ගන්නා ලෙස ද වෛද්‍යවරයා පැවසීය.

සෞඛ්‍ය සේවා කාර්යාල මගින් හෝ කෘෂිකර්ම නිලධාරීන්ගෙන් ඖෂධය නොමිලේ ලබා ගතහැකි බවත් එසේ නොමැතිනම් සුළු මුදලක් ගෙවා ඔසු සලකින් ලබා ගත හැකි බවද ඔහු සඳහන් කළේය.

ගොවිතැනෙහි යෙදෙන්නන් පමණක් නොව පස් හා මඩ ආශ්‍රිතව කටයුතු කරන ඕනෑම පුද්ගලයෙකු මෙම ඖෂධය ගැනීම අනිවාර්ය බවත් වෛද්‍යවරයා අවධාරණය කළේය.

තද උණ සමඟ මස්පිඬු වේදනාව පවතින්නේ නම් වහාම වෛද්‍යවරයෙකු වෙත ගොස් ප්‍රථිකාර ලබාගැනීමෙන් සංකූලතා ඇතිවීම වළක්වාගත හැකි බවත් ඒ මහතා සඳහන් කළේය.